„Get ég vinsamlegast beðið um frið fyrir þessu endalausa kærastakjaftæði?“

Árni Snævarr erindreki birtir yfirlýsingu á Facebooksíðu sinni þar sem hann lýsir því yfir að hann sé ekki kærasti Lindu Pétursdóttur athafnakonu og fyrrverandi alheimsfegurðardrottningar.

Tilefnið er frétt í Séð og heyrt þar sem þetta er gefið til kynna. Árni birtir skrifleg samskipti sín og Eiríks Jónssonar, ritstjóra Séð og heyrt, til sönnunar því að Eiríkur skrifi gegn betri vitund, svohjóðandi:

„Það var verið að benda mér á klausu um mig og Lindu Pé í Séð og heyrt. Nú vill svo til að ritstjóra Séð og heyrt, Eirík Jónssyni er full kunnugt um að fréttin er röng, en birtir hana samt. Eiríkur hafði samband við mig fyrir helgi.

Hér eru samskipti mín og hans hér á Facebook.

Eiríkur:Sæll félagi...góð grein ykkar Lindu um dýraníð í Fbl. í dag. Eruð þið nýtt par? Hringdu í mig í (númeri sleppt)

Föstudagur 13:58

Árni:Svarið er : „Nei.“

Eiríkur:En hver eru tengslin?

Árni:Eiríkur þu hefur ekkert eftir mér og ég þarf ekkert að útskýra fyrir þér hvernig ég þekki fólk, algjörlega mitt prívatmál

með fullri virðingu, ég hef bara ekki áhuga

Eiríkur:Hef ekkert eftir þér og hafðu það gott...

Árni:sömuleiðis, en þú mátt alveg halda þvi til haga að við erum ekki par!!!!!

Þrátt fyrir þetta birtir Eiríkur frétt um að við séum par!“

Ýmsir leggja orð í belg á síðu Árna um málið og síðuhöfundur segir að það megi hugsa sér ýmislegt verra en vera bendlaður við Lindu. En, þetta sé erfitt fyrir Lindu að þola, að vera orðin að frú Snævarr án þess að hafa nokkuð til þess unnið. Linda sjálf skýtur svo að athugasemd, sem er til þess fallin að taka af öll tvímæli. Og ekki er frítt við að nokkurrar gremju gæti vegna þeirrar áráttu fjölmiðlamanna að vilja pússa hana saman við hvern þann karlmann sem hún sést í námunda við.

„Ég er svo gjörsamlega komin með fullkomið ógeð á því að hver einasti maður sem ég þekki eða tengist á einhvern hátt, sé ætíð gerður að kærasta mínum. Í þessu tilviki, skrifuðum við vinirnir ég og Árni Snævarr grein saman um dýravelferð, það þurfti ekki meira til. Get ég vinsamlegast beðið um frið fyrir þessu endalausa kærastakjaftæði?“