Ekki bulla um öryrkja!

Formaður fjárlaganefndar, Vigdís Hauksdóttir, virðist vera að hita upp fyrir fjárlagagerðina með því að senda öryrkjum tóninn. Að hennar mati eru þeir of margir og hún óttast að þeir svindli óskaplega mikið á kerfinu og því vill hún stórefla eftirlit með greiðslum Tryggingastofnunar. Þessu sama fólki lofaði Framsóknarflokkurinn kjarabótum í kosningabaráttunni sem ekki hefur verið staðið við nema að litlu leyti. Hins vegar þurfa örorkulífeyrisþegar nú að borga meira fyrir mat vegna hækkunar matarskatts og greiða hærri húsaleiguleigu því húsaleigubætur hafa ekki hækkað í tíð þessarar ríkisstjórnar. Þá sýnir nýleg rannsókn að hlutfall af tekjum fólks til heilbrigðisútgjalda fer vaxandi. Kannski er formaður fjárlaganefndar að reyna að leiða athyglina frá þessum nöturlegu staðreyndum!

Fjöldi öryrkja

Haft er eftir formanni fjárlaganefndar að öryrkjar á Íslandi séu miklu hærra hlutfall af vinnuaflinu en annars staðar á Norðurlöndunum. Þetta er bara bull eins og bent hefur verið á af Stefáni Ólafssyni prófessor og stjórnarformanni Tryggingastofnunar á öðrum vettvangi. Í raun eru örorkulífeyrisþegar heldur færri hér í samanburði við flest Norðurlandanna.

Hvert er vandamálið?

Langalgengustu orsakir örorku hér á landi eru vegna geðraskana og stoðkerfissjúkdóma. Ég vil hvetja formann fjárlaganefndar til nýta starfsþrek sitt til að forgangsraða fjármunum í þágu örykja, fólks sem býr ekki við fulla starfsorku. Í fyrsta lagi verður að hækka örorkulífeyri því örorkulífeyrisþegar eru í mestri áhættu allra hér á landi að búa við fátækt, í öðru lagi þarf að hækka húsaleigubætur, í þriðja lagi verður að auka fjárveitingar til geðheilbrigðisþjónustu svo hún verði aðgengilegri og kosti minna, í fjórða lagi þarf að minnka kostnað fólks við heilbrigðisþjónustu og sjúkraþjálfun, í fimmta lagi þarf að veita meira fé til vinnuverndar og í sjötta lagi þarf að opna aftur framhaldsskólana fyrir fólki yfir 25 ára aldri svo allir fái tækifæri til að mennta sig til nýrra starfa. Þetta væri virðingarverð byrjun!