Byrjendalæsi

Byrjendalæsi er búið að vera mikið í umræðunni að undanförnu. Mig langar að rifja upp sanna sögu um byrjendalæsi.

Fyrir nokkrum árum hringdi góður vinur minn í mig og tjáði mér að hann hefði áhyggjur af sjö ára syni sínum. Hann væri bráðum búin með tvö ár í grunnskóla en gæti ekki kveðið að þriggja stafa orði. Í framhaldi af því spurði hann mig hvað væri til ráða. Ég spurði á móti: "Má ég hafa samband við skólastjóra hans". Hann samþykkti það.

Ég fékk viðtalstíma hjá yfirkennara og hann kannaðist við drenginn og vissi um vandann. Yfirkennarinn sagði að drengurinn væri ekki lesblindur og væri í hjálparkennslu 4 sinnum í viku og hringdi í kennarann til að sannfæra mig. Nú spurði ég hvað væri til ráða. Yfirkennarinn ráðlagði mér að hafa samband við Helgu Sigurjónsdóttur framhaldsskólakennara, hún væri með smábarnakennslu í Kópavogi.

Ég vissi hver Helga var, því á tímabili var svo mikið fjölmiðlafár í kringum hana. Helga hafði skýrar skoðanir á kennsluaðferðum almennt og voru skoðanir hennar mjög umdeildar t.d. af fólki í þessum fræðigeira. Helga tók drengnum vel og potaði honum í eitt af vornámskeiðunum. Þessi námskeið náðu yfir, að mig minnir, 5-6 vikur. Mæting var i fjögur skipti í viku, hálfan tíma í senn og skilyrði var að aðstandandi mætti með barninu. Ég tók að mér að mæta með barninu og því kynntist ég kennsluaðferðum Helgu, sem voru mjög hnitmiðaðar og einfaldar. Drengurinn fékk strax áhuga og gleypti allt sem Helga sagði og gerði og að sjálfsögðu voru framförin eftir því. Faðir drengsins sagði mér um sumarið að ef þeir væru út að keyra, bæði sonur sinn hann oft um að stoppa svo hann gæti lesið götuheitin hér og þar. Um haustið er skólinn byrjaði var hann fljótur að ná tökum á lestrinum.

Að fenginni reynslu sendi ég síðar fimm ára barnabarn mitt í lestrarnám til Helgu og hann var vel læs er hann byrjaði í skóla. Við vitum að ef okkur tekst á fyrsta ári barnanna í grunnskóla að gefa þeim góðan grunn í lesri og stærðfræði, þá er auðveldara með framhaldið. Það er að segja, slíkt leggur grunn að góðri sjálfsmynd sem er svo mikilvæg. Þá má einnig minnast þess að Helga var búin að þróa stærðfræðikennslu fyrir byrjendur og gefa út nokkur byrjendahefti. Því miður lést Helga fyrir nokkrum árum. Það er von mín að skólar kynni sér hennar kennsluaðferðir.