100 ára kosningaréttur, kvennamenning og kvennasaga

Enn er margt á döfinni vegna 100 ára afmælis kosningaréttar kvenna. Heimsóknir í Alþingishúsið eru til 25. ágúst með leiðsögn, en þar stendur yfir einstök sýning um konur í stjórnmálum. Senn hefjast þingstörf á ný og því eru síðustu forvöð að nýta þetta tækifæri.

Alþjóðleg ráðstefna á vegum afmælisnefndarinnar í samstarfi við Norrænu ráðherranefndina, RIKK og fleiri verður haldin í Hörpu dagana 22. og 23. október. Fyrri daginn er norræn ráðstefna og málþing til heiðurs Vigdísi Finnbogadóttur. Á norrænu ráðstefnunni verður m.a. fjallað um 100 ára þátttöku kvenna í stjórnmálum á Norðurlöndum. Þar koma fram norrænir fræðimenn og konur sem eiga sæti á þjóðþingum Norðurlanda. Síðari dagurinn er alþjóðlegur, með heimsþekktum fyrirlesurum. Þá verður m.a. rætt um það sem ógnar fullum kvenréttindum og hvert beri að stefna til að tryggja þau til framtíðar. Ráðstefnan er öllum opin og ókeypis, en nauðsynlegt er að skrá þátttöku. Skráning er hafin á heimasíðunni kosningarettur100ara.is/radstefna.

Verið er að gera heimildarmynd um fyrsta kvenfélagið, Kvenfélag Rípurhrepps, og verður hún sýnd 24. október nk., á 40 ára afmæli kvennafrídagsins, á sjónvarpsstöðinni N4. Með vorinu kemur út bók um útsaum alþýðufólks á vegum Safnasafnsins á Svalbarðseyri, sem hefur safnað heimildum og verkum sem þar koma fyrir sjónir almennings. Á sama tíma verður útsaumssýning í safninu. Í tilefni 100 ára afmælis kosningaréttarins er þar nú sýning á sérstæðum myndverkum 95 ára konu, Hrefnu Sigurðardóttur. Ástæða er til að hvetja þá sem eru á ferðinni í sumar að láta þetta yndislega safn ekki fram hjá sér fara.

Enn stendur yfir fjöldi sýninga vegna kosningaréttarafmælisins, svo sem sýningin „Hvað er svona merkilegt við það“ í Þjóðminjasafninu. Í Heimilisiðnaðarsafninu á Blönduósi er sýningin „Fínerí úr fórum formæðra,“ verk Guðrúnar Auðunsdóttur. Á Akranesi stendur sýningin „Saga líknandi handa“ til 27. september. Þar er rakin saga heilbrigðisþjónustu og sagt frá merkum konum sem þar koma við sögu. Í Safnahúsi Borgarfjarðar stendur sýningin „Gleym þeim ei“ til 1. nóvember – saga fimmtán kvenna úr héraðinu, unnin í samvinnu við afkomendur þeirra. Svona má rekja sig eftir söfnunum í landinu. Á heimasíðunni www.kosningarettur100ara.is má finna nánari upplýsingar um viðburði.