Ljón: Einbeittu þér að því að hugsa jákvætt

Elsku ómetanlega Ljónið mitt. Þú ert í fallegu lífi, opnaðu augun bara aðeins betur, sjáðu það góða í kringum þig og þakkaðu fyrir það. Þá margfaldast hið góða því þú ert magnari lífsins. Ef þú hugsar bara um það slæma færðu meira af því. Þetta skrifa ég til þín því plánetan þín er sólin. Já sólin sjálf!

Það er ekki búin að vera nein lognmolla í kringum þig og það skiptir öllu máli að nýta sér tengslanetið og efla sjálfan sig. Í því felast tækifæri sem tengjast vinnu. Það er verið að senda þér hjálp og hún mun birtast í því að fólk mun koma inn í líf þitt og sýna þér hvað þú getur gert og gefa þér það sem þú þarft. Þetta eru sendiboðar alheimsins.

Orðið sendiboði þýðir engill. Og í þínu tilfelli er það sólarengill, elsku Ljónið mitt.

Í mestu erfiðleikum okkar fáum við vilja til að sjá ljósið. Líttu upp í ljós með Palla er lagið þitt fyrir næsta mánuðinn. Ný tækifæri eru í kortinu þínu sem munu efla afkomu þína og vinsældir.

Mottó: Ég er mátturinn og dýrðin.

Frægir í Ljóninu: Cara Delevingne fyrirsæta, Ágústa Eva Erlendsdóttir, leik- og söngkona, Halldóra Geirharðsdóttir leikkona, Birgitta Haukdal söngkona, Barack Obama Bandaríkjaforseti, Ásdís Rán fyrisæta, Geir Ólafsson söngvari, Þórunn Antonía alheimsstjarna, Jón Óttar Ragnarsson, athafna- og fjölmiðlamaður, Jennifer Lopez söngkona, Diddú, Sirrý Arnardóttir fjölmiðlakona, Arnór Dan, söngvari Agent Fresco.