Krabbinn: Hafðu trú á sjálfum þér

Elsku hressi Krabbinn minn. Það er svo mikill kraftur í kortinu þínu að þú verður að nýta þér hann. Það er eins og þú sért að ganga stigann að takmarki þínu og sjáir skýrt hvað þú vilt.

Ekki setjast niður og hvíla þig því þá stoppar allt. Haltu áfram og stattu við það sem þú ert búin að ákveða. Það eru margir að ýta á eftir þér því það er svo mikið af fólki sem elskar þig og þú ert sólin þeirra.

Fáeinir smáborgarar gætu reynt að hindra þig en mundu bara að smáborgarar eru vælufólkið sem sér bara hið neikvæða.

Borðaðu sjálfstraust í morgunmat og trúðu því að þú getir og þá ertu kominn hálfa leið. Þú verður öfundaður en orð þeirra sem öfunda særa þig ekki nema þú trúir þeim. OK?

Þú ert fullur af ástríðu en þér gæti líka dottið í hug að hanga í sambandi sem er ekkert að gefa þér. Svo annaðhvort breyttu því og hættu í sambandinu eða lagaðu það. Þeir sem eru á lausu þurfa fyrst og fremst að skoða það að ná sér í skemmtilega manneskju.

Mottó: Ég elska að hanga með mér og ég trúi á það sem ég er að fara að gera.

Frægir Krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason.