Guðlaugur Þór og bullið

Í síðustu viku skrifaði Guðlaugur Þór, alþingismaður, tvær greinar hér á visir.is og í Fréttablaðið um heilbrigðismál. Í fyrri greininni spyr hann m.a. hvort við eigum að loka SÁÁ? Slík spurning er bara bull, eiginlega mega-bull.

En mig langar að grípa þennan SÁÁ-bolta á lofti og varpa fram nokkrum spurningum og hvetja Guðlaug til að velta þeim fyrir sér og svara þeim:

Hvers vegna hafa yfirvöld ekki eftirlit með starfsemi SÁÁ?

Hvers vegna hafa yfirvöld aldrei reynt að mæla árangur SÁÁ?

Er eðlilegt að samtök úti í bæ reki sjúkrahús, að mestu fyrir fé skattgreiðenda?

Væri betra og hagkvæmara að Landspítalinn yfirtaki rekstur sjúkrahúsins Vogs, en SÁÁ gæti áfram sint sínu starfi á Staðarfelli,Vík og í Efstaleitinu?

Hvers vegna er starfsmannavelta ráðgjafa SÁÁ svona stjarnfræðilega há? Getur verið að það sé vegna þess að þeir eru beittir andlegu ofbeldi af stjórnendum SÁÁ?

Byrgismálið er gott dæmi um misheppnaða útvistun í heilbrigðisþjónustu.

Er Guðlaugur Þór búinn að gleyma Byrgismálinu? Hefur Guðlaugur Þór ekkert lært af Byrgismálinu?

Þjónustunni við þennan sjúklingahóp, áfengis og vímuefnafíkla, er að mestu útvistað til samtaka og trúarhópa úti í bæ, mest til SÁÁ. Núverandi heilbrigðisráðherra og allir hans forverar s.l. 40 ár eða svo, hafa allir kosið að gera verktakasamning við SÁÁ, án þess að spyrja um árangur og án þess að hafa eftirlit með starfseminni.

Er það ekki óábyrg meðferð á fé skattgreiðenda?

Er ekki tímabært að taka upp meiri fagmennsku í þjónustunni við þennan sjúklingahóp?