Samfélag eða Excel-skjal

Þrátt fyrir að mikið hafi áunnist í rekstri Hafnarfjarðarbæjar eftir efnahagshrun er mikilvægt að tryggja áframhaldandi aðhald og alltaf er svigrúm til að gera betur. Um það held ég að allir geti verið sammála og fulltrúar allra flokka í bæjarstjórn séu meðvitaðir um. Okkur greinir aftur á móti á um forgangsröðun, aðferðir og leiðir. Stjórnunaraðferðir nýs bæjarstjóra og framkoma núverandi meirihluta gagnvart starfsfólki bæjarins er meðal þess sem við í minnihlutanum getum ekki sætt okkur við eða tekið þátt í.

28% launahækkun bæjarstjóra

Á sama tíma og gengið er fram af mikilli hörku gagnvart starfsfólki og allar mögulegar leiðir farnar í þeim tilgangi að skerða starfskjör þess hefur launakostnaður vegna embættis bæjarstjóra hækkað um tæplega 28% á milli ára, eða sem nemur um fimm milljónum króna á ársgrundvelli. Það er meira en margt af starfsfólki Hafnarfjarðarbæjar hefur í árslaun, fyrir störf sem eru svo sannarlega ekkert síður merkileg eða mikilvæg.

Bifreiðahlunnindi bæjarstjórans hafa reyndar hækkað enn meira en launin eða um 86% á einu ári. Það eitt og sér er næg ástæða til að krefja meirihluta bæjarstjórnar skýringa.

Hroki og virðingarleysi

Okkar upplifun er sú að innleidd hafi verið stefna og aðferðafræði í mannauðsmálum sem einkennist af hroka og virðingarleysi gagnvart þeim sem eiga að sinna þjónustu við bæjarbúa.

Í því samhengi er ástæða til að benda á að flestir þeirra starfsmanna sem hafa misst vinnuna eiga langan og farsælan starfsferil að baki í þjónustu við bæjarbúa. Meðalstarfsaldur þeirra er 16 ár og stór hluti á aðeins nokkur ár í áætluð starfslok.

Auk þess virðist fullkomlega óljóst hvort þessar aðgerðir muni skila raunverulegum sparnaði þegar upp er staðið en kostnaðurinn við uppsagnirnar og samninga þeim tengda hleypur á tugum milljóna króna. Nú þegar hafa líka verið auglýstar nokkrar nýjar stöður lausar til umsóknar sem væntanlega mun hafa einhver útgjöld í för með sér. Það er heldur ekki ósennilegt að hluti þess starfsfólks sem hefur verið sagt upp leiti réttar síns hjá dómstólum og því verður ekki spurt fyrr en að leikslokum um endanlegan kostnað bæjarins.

Nóg komið

Meirihluti bæjarstjórnar getur ekki skammtað einum manni tugprósenta launahækkun á sama tíma og það er verið að svipta fólk atvinnu og krefjast þess af öðru starfsfólki að það taki á sig launalækkanir. Í hugum flestra segir þetta sig sjálft og því óskiljanlegt að meirihluti Bjartrar framtíðar og Sjálfstæðisflokks skuli ekki sjá að þetta gengur ekki upp. Hafnarfjörður er nefnilega samfélag en ekki Excel-skjal og starfsfólk bæjarins er manneskjur en ekki tölur á blaði.