Bankastjóri Landsbankans: Bankinn sparar með nýjum höfuðstöðvum

Landsbankinn fékk lóð undir nýjar höfuðstöðvar á um þrefalt lægra verði en lóðir í miðborginni eru að fara á í dag. Bankastjóri bankans segir byggingu nýrra höfuðstöðva stuðla að sparnaði í rekstri sem komi bæði eigendum bankans og viðskiptavinum til góða.

Byggingaráform Landsbankans í holunni við hliðina á Hörpu hafa vakið hörð viðbrögð í þjóðfélaginu og jafnvel verið kölluð bruðl og óþarfi. Vissulega má deila um staðsetningu byggingarinnar en eitt er víst að Landsbankinn fékk lóðina á afar góðum kjörum og jarðvegsvinnu á lóðinni er að auki lokið.

Bankinn fékk lóðina á 58 þúsund krónur fermetrann en innifalið í því verði voru gatnagerðargjöld sem eru um 19.000 krónur. Því má segja að fermetraverðið sé 39 þúsund krónur sem telst mjög lágt verð.

Nú stendur til að byggja íbúðablokkir á lóðinni við hótel Marina við hlið gamla slippsins. Samkvæmt heimildum fréttastofunnar var fermetraverð lóðarinnar um eitt hundrað þúsund krónur, eða tæplega þrisvar sinnum hærra en verðið á Landsbankalóðinni.

Steinþór Pálsson, bankastjóri Landsbankans, segir áætlað að nýjar höfuðstöðvar Landsbankans, að lóðarkostnaði meðtöldum, kosti átta milljarða króna sem borgi sig upp á tíu árum.

Hagkvæm fjárfesting

„Þetta er hagkvæm fjárfesting. Við erum að spara 700 milljónir króna á ári. Þannig að þetta kemur strax til baka. Rekstrarreikningur bankans verður þá 700 milljónum króna betri en hann er í dag,“ segir Steinþór.

Þessi fjárfesting muni því árlega gera bankanum betur kleift að greiða eiganda sínum, ríkinu,  arð og lækka kostnað viðskiptavina bankans. Hér sé ekki um montbyggingu að ræða enda sé bankinn í dag í einu fallegasta húsi landsins.

Sjá einnig: Kári Stefánsson vill að þjóðin fái að rífa nýjar höfuðstöðvar Landsbankans

Það hafa margir blandað sér í þessa umræðu. Þeirra á meðal Sigmundur Davíð Gunnlaugsson forsætisráðherra. Hann hefur talað um að bankinn gæti einfaldlega farið inn í Tollstjórabygginguna. Hún ætti að duga bankanum?

„Já, Tollhúsið. Ég er alveg sammála forsætisráðherra  um að það er glæsileg bygging. Þetta er skrifstofubygging að stórum hluta,“ segir Steinþór. En ef hún væri á lausu þyrfti að eyða töluverðu fé í að laga hana og byggja við hana. Hann hafi kannað kaup á henni fyrir nokkrum árum.

„Svörin komu til baka um að ríkið ætlaði að nýta þetta fyrir tollstjóra og fleira. Þannig datt það upp fyrir þá,“ segir Steinþór.

Hann segir verðið á Hörpureitunum hafa verið gott og bankinn vilji vera með starfsemi í návígi við aðra fjármálastarfsemi í landinu, sem og þjóna viðskiptavinum og ferðamönnum. Þá segir hann eigendur bankans, ríkissjóð, geta og hafa komið að málum því aðalfundur hafi verið haldinn frá því lóðin var keypt.

„Næsti skipulagði fundur er í vor. Þá verða engar framkvæmdir hafnar. Þannig að aðkoma eigenda er tryggð. Þeir geta þá sett sitt sjónarhorn á allt málið,“ segir Steinþór.

En Landsbankinn er ekki einn í byggingarhugleiðingum. Íslandsbanki er með um sjö þúsund fermetra höfuðstöðvar á Kirkjusandi og er að skoða að stækka þær um nokkur þúsund fermetra. En höfuðstöðvar Íslandsbanka eru nú á þremur stöðum í borginni.