Rokkari lætur ráðamenn heyra það: „Þið eruð að djöggla með líf barnanna okkar, helvítis fólkið ykkar!“

„Þið eruð að djöggla með líf barnanna okkar, helvítis fólkið ykkar!,“ skrifar Snæbjörn Ragnarsson, bassaleikari þungarokkssveitarinnar Skálmaldar, á Facebook þar sem hann lætur yfirvöld heyra það vegna aðstæðna í heilbrigðiskerfinu.

Snæbjörn segist  geta þakkað starfsfólki Landspítalans fyrir að dóttir þeirra Anna er á lífi í dag. Anna fæddist á Landspítalanum 17. apríl síðastliðinn og reyndist fæðingin afar erfið. Stúlkan hafði lent axlarklemmu þar sem önnur öxl barnsins lendir undir lífbeini móðurinnar. Á þeim tímapunkti var of seint að grípa til keisaraskurðar og segir Snæbjörn að hann hefði getað bæði misst barnið og barnsmóður sína.

Hann segir ótrúlega atburðarás hafa farið af stað í kjölfarið þar sem um 10 starfsmenn fæðingardeildarinnar unnu allir að því að bjarga lífi barnsins og móðurinnar.

Sex dögum frá fæðingu Önnu gengu foreldrarnir með hana alheilbrigða út af Landspítalanum en Snæbjörn spyr sig í pistlinum sem hann birtir á Facebook hvernig staðan verði á Landspítalanum eftir tvö ár, fimm eða tíu?

Hann talar til þeirra sem standa vaktina gagnvart heilbrigðiskerfinu þegar hann segir meðferð þeirra heilbrigðiskerfinu ekki snúast um pólitík heldur um almenna skynsemi, mannréttindi og rökhugsun.

„Að höggva svona úr meginstoð samfélags er foráttuheimska og sú heimska skrifast á ykkur sem ráðið. Endilega rífist eins og frekir smákrakkar um samfélagsmál, alþjóðamál og stjórnunarhætti af öllu tagi, það er sennilega öllum hollt þegar upp er staðið. En þetta lýtur öðrum lögmálum. Ef við setjum allt skrum og allar flækjur á ís og horfum á ískaldan kjarna málsins þá eruð þið að stuðla að því að hvert og eitt okkar eigi minni möguleika á heilbrigðu lífi. Þið plokkið mannspil og ása kerfisbundið úr stokknum, skilið inn tvistum og þristum til baka og áhrifin af því eru nú þegar orðin skelfileg.“

Hann biður ráðamenn um að láta af þessari hegðun eða að víkja fyrir öðru fólki. „Sem er ekki svona ótrúlega tregþenkjandi eins og þið virðist vera. Ég sætti mig aldrei við minna.“

Pistilinn má lesa í heild hér fyrir neðan:

Þetta er dóttir mín, Anna Snæbjörnsdóttir. Hún er þriggja mánaða gömul í dag og vitanlega fallegasta barn í heimi.Anna...

Posted by Snæbjörn Ragnarsson on Friday, July 17, 2015