Júlíspá Siggu Kling - Fiskur: Ekki láta streituna yfirbuga þig

Elsku meðvirki fiskur. Ég hef stúderað þig lengi og meðvirkasta fólk í heimi er í þínu merki. Þú ert alltof góður, gefur alltof mikið og svo getur þú orðið innanpirraður. Það er allt í lagi að láta fjúka í sig, vera leiður og fara stundum í fýlu. Þú getur ekki alltaf verið uppistandarinn í partýinu.

Þú ert svo tilfinningaríkur og elskar ástina. Þú ert besti maki sem völ er á en þú trúir ekki alltaf að ástin vilji þig. Þú átt það til að vera reiður út í ástina og þá sem þú verður ástfanginn af, það gerir þú til þess að sýna ekki alveg þitt rétta andlit. Þú ert búinn að koma svo mörgu fólki áfram en núna skaltu biðja veröldina um að leysa þín vandamál og SLAKA Á! Það er þinn lykill.

Það er nefnilega algengt að þú fáir streitukvilla og veikindi í kjölfarið. En nú skaltu treysta því að almættið raði upp fullkomnu ferðalagi. Taktu hendurnar af stýrinu og leggðu þig í aftursætinu. Þar vil ég hafa þig um stund til þess að róa þig aðeins niður.

Þú ert að skapa svo miklar minningar núna, bæði hjá þér og öðrum. Þú ert náttúrulega sumarfiskurinn og átt svo mikið af vinum. Núna er tíminn til að kalla á þá og leyfa þeim að umlykja þig. Náttúran gefur þér kraft til að framkvæma, svo það er alveg ljóst að þú ert ekki náttúrulaus. Öll sú listamannsorka sem til er mun vera að fæðast hjá þér núna. Nýttu þér allan þann listamannskraft sem þú hefur, það mun koma þér á kortið. Það elska þig allir.

Mottó: Í erfiðleikunum í kringum mig er falinn demantur.



Frægir í fiskunum: Elísabet Ásberg listamaður, Diana Omel listamaður, Beggi hans Pacasar, Baltasar Kormákur leikstjóri, Árni Johnsen fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn kóngur.