Tugir látnir þegar skóverksmiðja brann á Filippseyjum

Að minnsta kosti 31 er látinn eftir stórbruna í skóverksmiðju skammt frá filippseysku höfuðborginni Manila fyrr í dag. Reuters greinir frá þessu.

Verksmiðjan er í bænum Valenzuela norður af Manila. Að sögn talsmanns yfirvalda flúðu margir starfsmenn upp á aðra hæð verksmiðjunnar þegar eldurinn kviknaði og þar hafi þeir brunnið inni.

Talið er að eldurinn hafi orsakast af völdum neista vegna framkvæmda við inngang verksmiðjunnar.

Eldurinn logaði í um fimm klukkutíma áður en slökkvilið náði tökum á eldinum.