Real Madrid mætir Olympiacos í úrslitaleik Meistaradeildarinnar

Það verður Real Madrid sem mætir Olympiacos í úrslitaleik Meistaradeildar Evrópu í körfubolta á sunnudaginn.

Sjá einnig: Olympiacos í úrslitaleikinn í þriðja sinn á síðustu fjórum árum.

Real Madrid tryggði sér sæti í úrslitaleiknum með níu stiga sigri, 96-87, á Fenerbache í seinni undanúrslitaleiknum í kvöld en úrslitahelgin fer fram á heimavelli Madrídinga.

Mexíkóinn Gustavo Ayon skoraði 18 stig, tók sjö fráköst og gaf sex stoðsendingar fyrir Real Madrid sem leiddi með 20 stigum í hálfleik, 55-35.

Eftirleikurinn var auðveldur fyrir Real Madrid sem er sigursælasta lið í sögu keppninnar.

Tuttugu ár eru hins vegar liðin síðan Real Madrid vann titilinn síðast en Madrídingar fá tækifæri til að bæta níunda titlinum í safnið á sunnudaginn þegar Spánverjarnir mæta gríska liðinu Olympiacos.

Þessi lið mættust í úrslitaleik Meistaradeildarinnar fyrir tveimur árum þar sem Grikkirnir höfðu betur, 100-88.