Ásgeir Jónsson ráðinn til Virðingar

Verðbréfafyrirtækið Virðing hefur ráðið  Ásgeir Jóns­son, dós­ent í hag­fræði við Há­skóla Íslands, sem efnahagsráðgjafa fyrirtækisins.

Í tilkynningu frá Virðingu segir að aukin umsvif fyrirtækisins í kjölfar sameiningu við Auði Capital á síðasta ári kalli á frekari sjálfstæða ráðgjöf og greiningar á sviði efnahagsmála.

Ásgeir Jónsson hefur verið lektor við hagfræðideild Háskóla Íslands frá 2004 og dósent við sama skóla frá árinu 2014. Ásgeir varð aðalhagfræðingur  Kaupþings í ársbyrjun 2004 og forstöðumaður greiningardeildar Kaupþings á árunum 2006–2008. Hann gegndi síðan sömu stöðu hjá Arion banka á árunum 2008 til 2011. Ásgeir starfaði sem efna­hags­ráðgjafi verðbréfafyrirtækisins GAMMA þar til í desember á síðasta ári.

Hannes Frímann Hrólfsson, forstjóri Virðingar, telur mikinn feng í að fá Ásgeir til liðs við Virðingu. „Fáir búa yfir jafn mikilli reynslu af greiningum á fjármálamarkaði og hann, enda hafa kraftar hans verið mjög eftirsóttir á sviði peningahagfræði, fasteignamarkaðar og almennrar þjóðhagfræði. Það styrkir jafnframt aðrar deildir Virðingar að hafa aðgang að manni með hans reynslu,“ segir Hannes.