Gengu út af tökustað á mynd Adam Sandler

Hópur leikara gekk út af tökustað á nýrri mynd Adam Sandler þar sem þeir töldu myndina sýna menningu indíána óvirðinu. Leikararnir níu sem gengu út eru allir indíánar.

Netflix, sem vinnur að myndinni ásamt Sandler, segir að myndin, The Ridicilous Six, sé háðsádeila. Samkvæmt frétt BBC segir talsmaður Netflix að myndinni sé ætlað að gera grín af þekktum staðalímyndum sem koma fyrir í fjölda bíómynda.

Einn leikaranna sem gekk út af tökustað segir að myndin sýni konum og elda fólki innan indíánaættbálka mikla óvirðingu. Annar leikari segir að þeim sem voru ósáttir hafi verið sagt að ganga út. Lengi hefur verið ósætti innan Hollywood milli kvikmyndaframleiðanda og indíána.

Ásamt Sandler leika Taylor Lautner og Steve Buscemi í myndinni. Hún er fyrst fjögurra mynda sem Sandler hefur samið um að gera í samstarfi við Netflix.