Innlent

„Svo mikið Gamla Ísland að manni verður ómótt“

Sunna Kristín Hilmarsdóttir skrifar
Helgi Hjörvar, Ragnheiður Elín Árnadóttir og Birgitta Jónsdóttir voru á meðal þeirra sem ræddu ívilnunarsamning Matorku á Alþingi í dag.
Helgi Hjörvar, Ragnheiður Elín Árnadóttir og Birgitta Jónsdóttir voru á meðal þeirra sem ræddu ívilnunarsamning Matorku á Alþingi í dag. Vísir
Sérstök umræða um ívilnunarsamning Matorku við ríkið fór fram á Alþingi í dag. Sitt sýnist hverjum um samninginn sem getur í mesta lagi hljóðað upp á 425 milljónir samkvæmt Atvinnuvega- og nýsköpunarráðuneytinu. Auk þess hefur fyrirtækið óskað eftir að fá 52 milljónir í þjálfunarstyrk sem það getur átt rétt á að hluta en hámark ívilnana er 450 milljónir króna.

Helgi Hjörvar, þingmaður Samfylkingarinnar, hóf umræðuna og sagði um stórfurðulegan ívilnunarsamning að ræða. Spurði hann meðal annar hvernig ráðherra réttlætti þennan samning og hvernig hún leyfði sér að gera samninga án þess að fara eftir gildandi lögum.

Vísaði hann til þess að engin rammalöggjöf er nú í gildi vegna fjárfestingasamninga en lög sem ríkisstjórn Samfylkingar og Vinstri grænna setti árið 2010 runnu úr gildi árið 2013. Fyrir þinginu liggur nú nýtt frumvarp iðnaðar-og viðskiptaráðherra um ívilnanir nýsköpunarfyrirtækja og er samningurinn við Matorku gerður með fyrirvara um að það frumvarp verði samþykkt.

„Hvers vegna fær þetta fyrirtæki sérmeðferð hjá ráðherra? Ég segi að það fái sérmeðferð vegna þess að tvö önnur fyrirtæki, Thorsil og Algalíf, fengu samninga sem voru sérstaklega lagðir fyrir þingið því það eru engin lög í gildi. Hefði ekki þvert á móti verið ástæða til að fara sérstaklega varlega vegna margvíslegra tengsla fyrirtækisins við Sjálfstæðisflokkinn?“ sagði Helgi.

„Hátt reitt til höggs en þetta eru vindhögg“

Ragnheiður Elín Árnadóttir, iðnaðar-og viðskiptaráðherra, sagði Helga hafa farið með rangt mál í öllum grundvallaratriðum varðandi samninginn.

„Andstæðingar þessa máls hafa lagt mikið á sig til þess að gera það tortryggilegt. Síðast í morgun tók fyrrverandi formaður Samfylkingar þennan samning sem dæmi um þá spillingu sem viðgengst í núverandi ríkisstjórn. Ég verð að segja að það er hátt reitt til höggs en þetta eru vindhögg. Ég fullyrði það að þessi samningur hefði fengið nákvæmlega sömu afgreiðslu hjá seinustu þremur iðnaðar-og viðskiptaráðherrum, þeim Katrínu Júlíusdóttur, Oddnýju Harðardóttur og Steingrími J. Sigfússyni,“ sagði Ragnheiður Elín. Þá sagði hún að nákvæmlega sömu leikreglum hefði verið fylgt við gerð samningsins og síðustu fimm ár.

Sagði eiganda Matorku hafa setið beggja megin borðsins

Birgitta Jónsdóttir, þingmaður Pírata, sagði að það alvarlegasta við málið hafa verið það að eigandi Matorku sat beggja vegna borðsins.

Þar vísaði hún í það að einn af hluthöfum í Matorku, Eiríkur Svavarsson, kom fyrir atvinnuveganefnd þingsins fyrir hönd lögmannafélagsins og veitti umsögn fyrir hönd lögmannafélagsins um áðurnefnt frumvarp um ívilnanir. Fram hefur komið að Eiríkur hafi ekki upplýst nefndina um eignarhlut sinn í Matorku en hann sagði í yfirlýsingu að hann hefði ekki haft neinna hagsmuna að gæta.

„Eigandi Matorku sat beggja megin borðs við garð þessa risasamnings, þar er kjarni málsins. [...] Mig langar því að spyrja ráðherrann hvort að þetta sé í samræmi við stefnu og sýn Sjálfstæðisflokksins að mismuna á þeim grundvelli að aðili sem fær 426 milljónir í formi afslátta á sköttum sitji beggja vegna borðs og mæti meira að segja fyrir atvinnuveganefnd án þess að skýra nefndinni frá því,“ sagði Birgitta.

Uppfært klukkan 18:30: Í upphaflegri útgáfu þessarar fréttar var sagt að samningurinn hljóðaði upp á 450 milljónir króna. Það er ekki rétt, samkvæmt upplýsingum frá aðstoðarmanni Ragnheiðar Elínar Árnadóttur, og hefur nú verið leiðrétt.


Tengdar fréttir

Þingmenn ósáttir við rök ráðherrans

Ívilnanasamningur ríkisins við Matorku var til umræðu á atvinnuveganefndarfundi þingsins í gær. Nefndarmenn minnihlutans voru ekki sáttir við röksemdafærslu ráðherrans. "Skekkir leikinn á markaði,“ segir Björt Ólafsdóttir.

Segist enga hagsmuna eiga vegna nýs frumvarps

Eiríkur Svavarsson, einn af eigendum Matorku ehf, segir að verið sé að leitast við að kasta rýrð á störf sín í laganefnd Lögmannafélags Íslands í ljósi eignarhaldsins á Matorku.




Fleiri fréttir

Sjá meira


×