Eldsvoði í Eyjafirði

Mikið tjón varð þegar eldur kviknaði í tengibyggingu á milli tveggja stórra gróðurhúsa  á garðyrkjubýlinu Brúnulaug í Eyjafjarðarsveit um klukkan tvö í nótt.

Mikill eldur logaði þegar slökkviliðið á Akureyri kom á vettvang og hafði hann náð að teygja sig eitthvað inn í gróðurhúsin sjálf, en slökkvistarf gekk vel.  Miklar skemmdir urðu á húsunum, en þar var paprikkurækt komin á lokastig.

Ekki er ljóst hvort uppskeran er öll ónýt. Rafmagn fór af gróðrastöðinni og nokkrum bæjum í kring, en starfsmönnum RARIK tókst að koma straumi á aftur. Eldsupptök eru ókunn og rannsakar lögregla málið.