Þær tíu hugmyndir sem keppa til úrslita í Gullegginu

Frumkvöðlakeppnin Gulleggið er nú á lokametrunum. Keppninni bárust 251 hugmynd og úr þeim voru gerðar 100 viðskiptaáætlanir.

Þetta kemur fram í tilkynningu frá Innovit. Eftir að fjölmennur rýnihópur fagaðila las áætlanirnar yfir og gaf þeim einkunn standa nú tíu stigahæstu hugmyndirnar eftir. Þær eru:

Appsláttur - Appsláttur sem minnir þig á afsláttinn

e1 - Deilihagkerfi hleðslustöðva fyrir rafbíla

Future Habits – Smáforrit sem kennir krökkum á aldrinum þriggja til sjö ára næringarfræði með myndrænum hætti

Jungle Bar - Orkustykki sem nýtir prótein úr skordýrum

Mekano ehf. - Samsett fjöltengi fyrir allar gerðir raftækja og USB lágspennutækja

Námsefnisbankinn - Safnar saman verkefnum útbúin af kennurum sem einfalt er að sækja og leggja fyrir.

Rofar Technology ehf. - Endurhannar staðalinn fyrir stýringu ljósa og heimilistækja eins og Apple endurhannaði snjallsímann

Sparta - Veflausn sem aðstoðar fólk að finna, halda utan um og skrá tölfræði tengda íþróttaviðburðum

Strimillinn - Miðlægt hugbúnaðarkerfi sem ætlað er að bæta aðgengi að upplýsingum um verðlag á dagvöru á Íslandi

Verðgreinir - Einfalt kostnaðarbókhaldskerfi, hannað fyrir snjalltæki, ætlað fyrir sjálfstætt starfandi verktaka.

Teymin munu kynna hugmyndirnar frammi fyrir dómnefnd laugardaginn 7. mars nk. og síðar þann dag verður ljóst hvaða hugmynd hlýtur Gulleggið í ár.

Þátttakendur hafa frá því í lok janúar setið vinnusmiðjur og námskeið þar sem þeir hafa unnið hugmyndir sínar áfram og gert úr þeim raunhæfar og vandaðar áætlanir.

Gulleggið fór fyrst fram árið 2008 en síðan þá hafa alls 1954 hugmyndir borist í keppnina. Fjölmörg starfandi fyrirtæki hafa stigið sín fyrstu skref í keppninni og má þar m.a. nefna Meniga, Cooori, Betri svefn, Karolina Fund, Sigurást, Pink Iceland, Controlant o.fl.

Gulleggið er haldið af Klak Innovit nýsköpunar og frumkvöðlasetri en verkefnisstjórn keppninnar skipa 14 sjálfboðaliðar frá samstarfsháskólunum HR, HÍ, Bifröst og LHÍ.

Verðlaunaafhending Gulleggsins er opin almenningi en hún fer fram á Háskólatorgi í Háskóla Íslands laugardaginn 7. mars nk. og hefst kl. 16:00.