„Team Heiða er algjörlega magnaður hópur“

Kvikmyndin Annie verður frumsýnd í Smárabío í dag klukkan 17.15 en allur ágóði miðasölunnar mun renna beint í styrktarsjóð Bjarnheiðar Hannesdóttur. Bjarnheiður, sem er fædd árið 1980, glímdi við átröskun frá unga aldri, án þess að hún eða fjölskylda hennar gerðu sér grein fyrir því eða áttuðu sig á alvarleika sjúkdómsins þegar hann ágerðist með árunum.

Eftir áralanga misnotkun á vatnslosandi lyfjum til að halda sér grannri, bilaði hjartað í Heiðu af langvarandi kalíumskorti. Hún hlaut víðtækan heilaskaða eftir langt hjartastopp og er nú bundin hjólastól og getur lítið tjáð sig.

„Við fórum af stað með styrktarsjóð með því markmiði að Heiða fái draum sinn uppfylltan um einhverja heilsubót,“ segir Sigrún Lilja oftast kennd við Gyðju. vinkona Heiðu og formaður styrktarsjóðsins.

Hér má sjá myndband sem var gert fyrir söfnunina.

„Draumur hennar er að komast út í stofnfrumumeðferð eftir að við kynntumst íslenskri stúlku sem var með sambærilegan heilaskaða og Heiða sem hefur farið í 6 stofnfrumumeðferð til Indlands og náð ótrúlegum bata í kjölfarið. Heiða gerir sér alveg fulla grein fyrir því að þessu fylgir áhætta og eins er ekki víst að þetta hjálpi en þetta gefur henni von og vilja til að halda áfram og gefast ekki upp. Það er sú von sem við byggjum þessa söfnun á,“ segir Sigrún Lilja en Heiða stefnir á að fara út í fyrstu meðferð um miðjan apríl. 

„Upphafið á söfnuninni var í maraþoninu s.l. haust sem gekk vonum framar en það vantaði þó lokahnykkinn til að koma stelpunni okkar út í apríl. Nú bindum við því vonir við að við náum að safna því sem uppá vantar með bíósýningunni á morgun og eins með styrktarsímanúmerunum en samhugurinn hefur farið langt fram úr björtustu vonum. Íslendingar standa heilshugar saman þegar á reynir og við sem stöndum henni nálægt erum virkilega hrærð yfir viðbrögðunum sem söfnunin, Heiða og fjölskylda hefur verið sýnd,“ bætir Sigrún við.

„Við erum virkilega þakklát Senu fyrir þessa ómetanlegu aðstoð að fá að halda bíósýningu sem rennur algjörlega óskert í styrktarsjóðinn.

Sveppi, Pétur og Gói koma og spjalla við gesti og gangandi í hléi og verður hægt að fá áritun frá strákunum,“ segir Sigrún Lilja.

„Að auki fær yngri kynslóðin pakka við hurð á meðan birgðir endast en Nettó voru svo yndislegir að styrkja okkur með gjafirnar. Við erum stútfull af þakklæti því aðstoð sem þessi er sko alls ekki sjálfsögð.

Að auki langar mig að koma á framfæri sérstöku þakklæti til þeirra ótrúlega hópi kvenna sem standa að þessum styrktarsjóði með okkur því án þeirra þrotlausu vinnu væri þetta ekki gerlegt. Team Heiða er algjörlega magnaður hópur.“

Fyrir þá sem vilja fara í bíó og styrkja Heiðu um leið við að fá draum sinn uppfylltan geta keypt miða hér en einnig verða miðar seldir við hurð á meðan birgðir endast: 

Nánari upplýsingar um viðburðinn má finna hér.

Þeir sem ekki komast í bíó en vilja samt styrkja er bent á Styrktarfélag Bjarnheiðar Hannesdóttur

Kt. 510714-0320

Reikningsnr. 0133-26-10190

Eða að hringja í styrktarsíma og velja upphæð sem rennur beint í styrktarsjóðinn:

907-3501 (1000 kr)

907-3503 (3000 kr)

907-3505 (5000 kr)

Styrktarsíðu Heiðu má nálgast á Facebook hér.