Undirbúnings­framkvæmdir á Hlíðarenda hafa ekki áhrif á flugbraut

Undirbúningsframkvæmdir á Hlíðarendasvæðinu við Reykjavíkurflugvöll geta hafist á næstunni eftir að borgarstjórn samþykkti fyrsta áfanga í framkvæmdaleyfi á svæðinu í dag. Minnihlutinn í borgarstjórn óttast framhaldið og telur að rétt hefði verið að bíða niðurstöðu Rögnunefndarinnar svo kölluðu.

En nefndin hefur umboð fram í júni til að skila tillögum sínu um framtíð flugvallar í Reykjavík. Hjálmar Sveinsson formaður umhverfis- og skipulagsráðs borgarinnar segir samþykkt borgarstjórnar í dag ekki hreyfa við minnstu braut Reykjavíkurflugvallar.

„Þessi fyrsta framkvæmd snýr eingöngu að framkvæmdarvegi svo kölluðum og undirbúningi fyrir uppbyggingu. Þetta er einungis fyrsti áfangi og ég held að þessi fyrsti áfangi hafi í sjálfu sér ekki áhrif á þessa umtöluðu braut,“ segir Hjálmar.

Þannig að það mun ekki þurfa að loka henni um og leið og þið samþykkið hér?



„Nei, það er ekki þannig,“ bætir hann við.

Hins vegar er þetta fyrsta skrefið í miklum framkvæmdum Valsmanna ehf en borgin mun þurfa að koma að samþykktum skipulags fyrir framhaldið. Guðfinna Jóhanna Guðmundsdóttir borgarfulltrúi Framsóknar og flugvallarvina segir reynsluna síðustu daga sýna að flugbrautin hafi komið að góðum notum fyrir sjúkraflug.

En þið óttist væntanlega framhaldið þegar framkvæmdir halda áfram?

„Já við óttumst framhaldið. Við lögðum fram tillögu í október þess efnis að borgarstjórn myndi ganga til viðræðna við Valsmenn um það að hnyka til byggingunum þannig að þær kæmust fyrir og neyðarbrautin gæti verið áfram. En það var ekki samþykkt í borgarráði,“ segir Guðfinna Jóhanna.

Halldór Halldórsson tekur undir þessi sjónarmið og sagði í hádegisfréttum Bylgjunnar að meirihlutinn væri með þessu að stíga skref sem gætu haft gríðarleg áhrif á flug og öryggismál í höfuðborginni. Eðlilegt væri að bíða eftir niðurstöðum Rögnunefndarinnar.

Hún hefði umboð fram í júní. Hefði ekki verið hægt að bíða þangað til?



„Oddviti Sjálfstæðisflokksins á að vita það að þessi tiltekna braut var aldrei á borði Rögnunefndarinnar. Hún var alltaf tekin út fyrir sviga. Það hafa allir vitað og það er rétt að hafa það í huga að þessi braut var tekin út af aðalskipulagi Reykjavíkur 2007 þegar Sjálfstæðismenn voru hér í meirihluta,“ segir Hjálmar Sveinsson.