Ef fyrirtæki er áskrifandi að símanum þínum fær það símtölin upplýst

„Í þeim tilvikum sem fyrirtækið er áskrifandi en starfsmaðurinn notandi er svar við spurningu þinni já,“ segir í svari Vodafone við þeirri spurningu hvort allir sem eru með símanúmer frá Vodafone og vinnuveitandi greiðir að einhverju leyti geti átt von á því að vinnuveitandi fái upplýsingar um símnotkunina frá Vodafone.

„Áskrifendur eiga rétt á að fá reikninga fyrir fjarskiptanotkun sína sundurliðaða á grundvelli ákvæða í fjarskiptalögum og reglna sem eru settar á grundvelli þeirra," segir Vodafone sem svaraði aðeins einni af tólf spurningum frá Fréttablaðinu vegna afhendingar fyrirtækisins á skrám yfir símtöl í númerum sem tengjast Hafnarfjarðarbæ.

Sjá einnig:Bæjarstjóri játar að hafa skoðað símtalaskrár

Þrír bæjarfultrúar hafa sent Persónuvernd kvörtun vegna málsins:

„Við getum ekki tjáð okkur um málefni einstakra viðskiptavina,“ segir  svari Vodafone við spurningum 1 til 11 hér að neðan. Að öðru leyti vísar fyrirtækið til fjarskiptalaga:

„Lögum samkvæmt geymir Vodafone gögn í sex mánuði skv. fyrirmælum í 42. gr. fjarskiptalaga. Félagið vinnur eftir skýrum verklagsreglum við meðhöndlum beiðna um vinnslu á fjarskiptagögnum, með hliðsjón af lögum um persónuvernd og meðferð persónuupplýsinga. Í reglugerð 526/2011, um reikningagerð fyrir fjarskiptaþjónustu, kemur fram að áskrifendur að fjarskiptaþjónustu eigi rétt á að fá reikninga fyrir fjarskiptaþjónustu ítarlega sundurliðaða. Í því felst að þeir geta fengið nákvæmari upplýsingar en þær sem birtast á almennum reikningum um fjarskiptaþjónustu þeirra. Kröfur um sundurliðun samkvæmt ákvæði þessu má uppfylla með rafrænum hætti og hafa viðskiptavinir Vodafone aðgang að umræddum upplýsingum á „Mínum síðum“.

Verklagsreglur Vodafone á þessu sviði eru skýrar, í samræmi við og þeim framfylgt í einu og öllu.“

1. Til hversu margra símanúmera náði yfirlitið sem sent var bænum?

2. Var um að ræða bæði fastlínunúmer og farsímanúmer?

3. Hver er skráður notandi umræddra símanúmera?

4. Eru einhverjir einstaklingar skráðir [notendur] umræddra símanúmera?

5. Leitaði Vodafone heimildar notenda umræddra símanúmera til að senda bænum yfirlit um símtöl tengdum númerunum?

6. Hvaða heimild hefur Vofafone til að láta slík gögn af hendi án samþykkis þeirra sem nota símana?

7. Hver hjá Hafnarfjarðarbæ óskaði eftir umræddum símgögnum?

8. Hver fékk gögnin send?

9. Hvernig var öryggi gagnanna sem send voru tryggt?

10. Hvers vegna sendi Vodafone Hafnarfjarðarbæ „yfirlit yfir öll símanúmer sem hringt hafði verið í“ en ekki aðeins „upplýsingar um hvort hringt hefði verið í þetta tiltekna númer á sex klukkustunda tímabili“ eins og segir í meðfylgjandi yfirlýsingu að óskað hafi verið eftir?

11. Hver greiðir af þeim númerum sem upplýsingarnar náðu til?

12. Geta allir einstaklingar sem eru með símanúmer frá Vodafone og vinnuveitandi greiðir að hluta eða öllu leyti átt von á því að vinnuveitandinn fái upplýsingar um símnotkunina kalli hann eftir því frá Vodafone?