Neyðarstjórn sett yfir þjónustu Strætó við fatlaða

Ákveðið hefur verið að skipa neyðarstjórn yfir ferðaþjónustu fatlaðra hjá Strætó B.S. eftir nýjustu mistök Strætó þegar 18 ára fötluð stúlka var skilin eftir í sjö klukkustundir í þjónustubíl Strætó í gær.

Þetta var ákveðið á fundi snemma í morgun með Degi B. Eggertssyni  borgarstjóra, Birni Blöndal formanni borgarráðs, oddvitum allra flokka í borgarstjórn, Haraldi Líndal bæjarstjóra í Hafnrfirði og Bryndísi Haraldsdóttur formanni stjórnar Strætó B.S.

Sjá einnig:Svona týndist stúlkan

Einnig var ákveðið að Stefán Eiríksson sviðsstjóri velferðarsviðs borgarinnar og fyrrverandi lögreglustjóri á höfuðborgarsvæðinu færi fyrir neyðarstjórninni. Fréttastofa náði tali af Stefáni Eiríkssyni sem vildi ekki tjá sig vegna málsins.

Borgarráð situr nú á fundi þar sem nýjasta hneykslið í þjónustu Strætó við fatlaða er m.a. til umræðu og að þeim fundi loknum mun áður nefndur hópur sem fundaði í morgun, koma saman á nýjan leik.

Eygló Harðardóttir félagsmálaráðherra hefur óskað eftir fundi með borgarstjóra vegna þjónustu Strætó við fatlaða, en ekki liggur fyrir hvort Dagur hafi samþykkt slíkan fund né hvenær sá fundur verður haldinn verði borgarstjóri við ósk ráðherra.

Uppfært klukkan 11:05

Reykjavíkurborg hefur sent frá sér yfirlýsingu vegna málsins.

Tilkynning frá Reykjavíkurborg

Reykjavíkurborg harmar það alvarlega atvik sem varð í tengslum við ferðaþjónustu fatlaðs fólks í gær og biður hlutaðeigandi innilega afsökunar á atvikinu. Ljóst er orðið að mistökin lágu ekki aðeins hjá bílstjóra ferðaþjónustunnar heldur varð einnig misbrestur á móttöku í frístund fatlaðs fólks í Hinu Húsinu og eftirlitsskyldu þess. Auk þess er ljóst að verkferlum er ábótavant.

 

Í morgun var haldin fundur með fulltrúum Strætó, ÍTR, velferðarsviðs og Hafnarfjarðar þar sem farið var yfir málið.

 

Boðað hefur verið til sameiginlegs fundar í Ráðhúsi Reykjavíkur kl. 12.00 í hádeginu í dag þar sem bæjarstjórar sveitarfélaganna á höfuðborgarsvæðinu auk borgarstjóra hittast ásamt stjórn Strætó.  Á dagskrá fundarins liggur fyrir tillaga sem miðar að því að gera úrbætur á ferðaþjónustu fatlaðs fólks með aðkomu hagsmunasamtaka.

 

• Tillagan gerir ráð fyrr því að skipuð verði sérstök neyðarstjórn yfir ferðaþjónustu fatlaðs fólks undir stjórn Stefáns Eiríkssonar, sviðsstjóra velferðarsviðs Reykjavíkurborgar með aðild fulltrúa Öryrkjabandalagsins, Sjálfsbjargar og Þroskahjálpar.

      

• Meginhlutverk stjórnarinnar verður að tryggja örugga og eðlilega þjónustu og framkvæmd ferðaþjónustu fatlaðs fólks eins fljótt og kostur er

Stjórnin hafi fullt umboð til að gera þær breytingar sem hún telur nauðsynlegar til að bæta úr í þjónustu og framkvæmd

 

• Stjórnin hafi einnig fullt umboð til að gera tillögur um breytingar á fyrirkomulagi eða framkvæmd þjónustunnar til framtíðar

 

• Farið verði í óháða úttekt á aðdraganda, innleiðingu og framkvæmd ferðaþjónustu fatlaðs fólks hjá Strætó.

 

• Sérstök úttekt verði gerð á alvarlegu máli Ólafar Þorbjargar Pétursdóttur

 

Með þessu er verið að taka undir hugmyndir sem komið hafa fram á síðustu dögum um óháða úttekt á ferðaþjónustu fatlaðs fólks og að sérstök stjórn með aðkomu hagsmunaaðila komi að málinu.