Ráðherra vill ræða við borgarstjóra um mál týndu stúlkunnar

Eygló Harðardóttir velferðarráðherra óskar eftir fundi við Dag B. Eggertsson borgarstjóra í kjölfar þess að 18 ára þroskaskert stúlka fannst í gærkvöldi í bíl frá ferðaþjónustu fatlaðra á höfuðborgarsvæðinu, eftir að hafa setið þar ein og yfirgefin í nokkrar klukkustundir fyrir utan heimili bílstjórans. Þá hafði Landsbjörg hafið fjölmenna leit að henni og lögreglan lýst eftir henni.

Þá hafa Sjálfstæðismenn í borgarstjórn óskað eftir að málið verði líka rætt í borgarráði í dag og Elsa Lára Arnardóttir, þingmaður Framsóknarflokksins hefur óskað eftir aukafundi í Velferðarnefnd Alþingis vegna málsins. Elsa Lára óskar eftir að fulltrúi frá borgarstjórn verði viðstaddur aukafundinn ásamt fulltrúum frá Þroskahjálp og Öryrkjabandalaginu til að ræða þá alvarlegu stöðu sem upp er komin, eins og hún orðar það og S. Björn Blöndal formaður borgarráðs segir að málið verði tekið upp hjá velferðarsviði borgarinnar í dag.

Bíll frá ferðaþjónustunni ók stúlkunni að Hinu húsinu í miðborginni um eitt leytið í gær og stóð til að sami eða annar bíll sækti hana um þrjú leytið og æki henni heim, en upp úr klukkan fjögur fóru foreldrar hennar að grennslast fyrir um hana, og kom þá í ljós að hún hafði aldrei komið í Hitt húsið. Hófst þá eftirgrennslan og leit, sem leilddi til þess að hún fannst í bílnum fyrir utan heimili ökumannsins, spennt í öryggisbelti, sem hún kann hvorki að losa eða spenna, að sögn föður hennar.

Strætó, sem annast þennan akstur sendi í gærkvöldi út afsökunarbeiðni til fjölskyldu stúlkunnar þar sem segir einnig að allt verði gert til að komast til botns í málinu.