Senegalflúran tekin að streyma á markað

„Þetta er stórt skref fyrir okkur og hálfgerður hátíðisdagur,“ segir Halldór Sigurðsson, framkvæmdastjóri Stolt Sea Farm á Íslandi. Starfsmenn fyrirtækisins slátruðu á miðvikudag og sendu á markað fyrstu 500 kílóin af flatfiskinum senegalflúru sem hefur verið alin í eldisstöð fyrirtækisins á Reykjanesi.

Eldisstöðin er staðsett í hrauninu við Reykjanesvirkjun og nýtir kælivatn orkuvers HS Orku til að ala þessa hlýsjávarfisktegund sem lifir helst við strendur Miðjarðarhafslanda, en frá Afríku teygir tegundin sig að ströndum Frakklands.

Fyrstu seiðin komu í hús 21. ágúst 2013 og slátrunin nú var afrakstur þess. Mjór er mikils vísir því Halldór segir að vikulega verði slátrað og selt tíu til fimmtán tonn á viku til útlanda; helst Evrópulanda en einnig Bandaríkjanna.

„Eins og staðan er í dag þá stefnum við á 500 til 550 tonna framleiðslu á ári,“ segir Halldór en það er nákvæmlega það magn af fiski sem áætlað var að framleiða eftir að fyrsti áfangi verksmiðjunnar var risinn. Verksmiðjan starfar nú á um 22.000 fermetrum en öðrum áfanga uppbyggingarinnar verður lokið 2018. Þá verður verksmiðjan 75.000 fermetrar að stærð.

Eldisfiskurinn sem um ræðir er verðmætur og afar eftirsóttur hjá matgæðingum um allan heim, enda sitja fínni veitingahús um flúruna. Heill og óunninn frá Stolt Sea Farm er hann seldur á um 12 til 13 evrur kílóið – eða um 2.000 krónur íslenskar. Sú tala er margföld á markaði erlendis eða á diski veitingahúsagesta.

Í kerjum stöðvarinnar eru í dag um 200 tonn í heildina, en þegar stöðin er fullbyggð verða alin þar tvö þúsund tonn á ári.

En hvað um íslenska neytendur og matgæðinga, fá þeir tækifæri til að kaupa þennan framandi flatfisk?

„Við viljum alveg endilega koma okkar fiski á íslenskan markað. Það er mikið spurt og það væri verulega gaman að geta selt þetta góðgæti í gegnum einhvern aðila hérna heima á Íslandi og ekki síst góða veitingastaði sem vilja prófa,“ segir Halldór.

Í dag starfa ríflega tuttugu manns í eldisstöðinni og fjölgar á næstunni. Þegar verksmiðjan er fullbyggð munu þar starfa 50 til 60 manns.