Skora á Ólaf Ragnar að bjóða sig aftur fram til forseta

Stofnuð hefur verið fésbókarsíða þar sem skorað er á Ólaf Ragnar Grímsson að gefa aftur kost á sér í embætti forseta Íslands á næsta ári. Stofnandi síðunnar á von á því að margir muni taka undir þessa áskorun.

Ólafur Ragnar er nú að klára sitt fimmta kjörtímabil og hefur enginn forseti setið lengur. Þúsundir manna skoruðu á Ólaf að gefa kost á sér til áframhaldandi setu í embætti fyrir síðustu kosningar en þá fékk Ólafur rúmlega 52 prósent greiddra atkvæða.



Guðmundur Franklín Jónsson hagfræðingur og fyrrverandi formaður Hægri grænna hefur nú stofnað fésbókarsíðu þar sem skorað er á Ólaf að gefa kost á sér enn á ný.



Hvers vegna viltu að Ólafur bjóði sig fram aftur?



„Hann er búinn að standa sig mjög vel. Sérstaklega í Icesave deilunni og hvernig hann náði að stoppa Icesave samningana á sínum tíma. Ég bjó til síðu þá í mars 2009 og fékk um 18 þúsund læk á hana. Mér finnst eins og það sé búið að afskrifa Ólaf í þessari umræðu en við skulum ekki gleyma því að þetta er hagkvæmasti kosturinn. Þetta myndi spara þjóðfélaginu gríðarlega mikla fjármuni ef hann myndi halda áfram,“ segir Guðmundur Franklín.



Nú er hann búinn að sitja í fimm kjörtímabil. Það er ekki langur tími að þínu mati?



„Nei þó að hann sitji eitt í viðbót það eru 24 ár það er ekki sérstaklega langt.“

Guðmundur segist finna fyrir miklum áhuga á málinu og á von á því að margir muni taka undir þessa áskorun.

„Menn eru sáttir við hann og hann hefur alltaf vaxið ár frá ári í embætti og núna er farið að hausta hjá honum og ágætt að hann fari inn í haustið sem forseti Íslands.“



Er þessi síða stofnuð með hans vilja?



„Nei reyndar ekki,“ segir Guðmundur