Eimskip gerir breytingar á siglingakerfi félagsins

Eimskip hefur ákveðið að sameina grænu og rauðu leiðirnar í siglingakerfi félagsins frá og með miðjum febrúar en þetta kemur fram í tilkynningu frá fyrirtækinu.

Græna leiðin hefur þjónað flutningum á milli Íslands og Norður-Ameríku með viðkomu í Sortland í Noregi og hafa gámar með uppruna í Evrópu og Skandinavíu náð tengingu við grænu leiðina með umskipun í Reykjavík. Rauða leiðin hefur hins vegar þjónað siglingum á milli Íslands og Evrópu ásamt því að sinna strandsiglingum á Íslandi. Með sameiningu þessara tveggja leiða skapast grundvöllur fyrir aukinn áreiðanleika þjónustunnar við flutninga á milli Evrópu og Norður-Ameríku.

Í tilkynningunni segir að sameinuð leið mun bera nafn grænu leiðarinnar og eftir sem áður munu þrjú gámaskip sinna þessari nýju leið. Munu þau sigla óslitið á milli Evrópu og Norður-Ameríku með viðkomu í að minnsta kosti þremur höfnum á Íslandi fyrir íslenska inn- og útflytjendur. Viðkomuhafnir á grænu leiðinni verða áfram þær sömu og á eldri leiðum, en með breytingunni næst samfelld þjónusta á milli Evrópu og Norður-Ameríku og ekki þarf að umhlaða gámum í Reykjavík eins og áður.

Breytingin á að styrkja einnig enn frekar sölu á flutningum á milli Norður-Ameríku og Evrópu og tryggir betur áreiðanleika þjónustunnar þar sem tengingar á milli mismunandi leiða félagsins hafa ekki alltaf náðst, ekki síst vegna slæms veðurfars. Með breytingunni eykst tíðni ferða á milli Evrópu og Norður-Ameríku um allt að fimm ferðir á ári.

„Það er ánægjulegt að geta boðið upp á aukna tíðni ferða og samfellda þjónustu á milli Evrópu og Norður-Ameríku þar sem flutningsmagn hefur verið að aukast til og frá Bandaríkjunum og Nýfundnalandi. Með breytingunni komum við einnig betur til móts við þarfir viðskiptavina okkar um óslitna flutningakeðju,“ segir Gylfi Sigfússon, forstjór.