Hlaut verðlaun í Tævan fyrir Free the Nipple-átakið

Það er eflaust mörgum enn í fersku minni þegar Adda Þóreyjardóttir Smáradóttir, 16 ára framhaldsskólanemi, birti mynd af brjóstunum sínum á Twitter fyrr á árinu en myndbirtingin var upphaf Free the Nipple-átaksins sem fór eins og eldur í sinu um samfélagsmiðla og fjölmiðla hér á landi.

Átakið vakti auk þess mikla athygli erlendis, meðal annars í Tævan, þar sem Adda er stödd nú en í gær tók hún við verðlaunum þar fyrir jafnréttisbaráttu sína. Verðlaunin voru veitt á ungmennaráðstefnu sem nú er haldin í tíunda skiptið en verðlaunin, Youth of the Year Award Taiwan, hafa ekki verið veitt áður.

„Það var maður sem heitir Lewis Lu sem sendi mér Facebook-skilaboð í ágúst og bauð mér á ungmennaráðstefnu hér í Taívan núna í október. Þá sagði hann mér líka að það ætti að veita mér verðlaun en mér datt ekki annað í hug en að þetta væri rugl. Svo komst ég reyndar að því með smá rannsóknarvinnu að þetta væru fullkomlega eðlileg skilaboð en auk mín fengu fjórir aðrir verðlaun á ráðstefnunni,“ segir Adda í samtali við Vísi.

„Maður er bara eins og súperstjarna hérna“

Verðlaunin eru veitt ungmennum undir 18 ára sem hafa með hugrekki sínu sýnt að þau vilja breyta heiminum en hinir vinningshafarnir fjórir koma frá Sýrlandi, Tansaníu, Malaví og Tævan en á bloggsíðu Öddu má lesa meira um verðlaunahafana.

Adda segir að þau hafi hitt ýmsa í tengslum við verðlaunin, meðal annars Tsai Ing-Wen, sem er formaður Lýðræðisflokksins en hún er talin líkleg til að vinna forsetakosningar í landinu í janúar og verða þar með fyrsta konan til að gegna því embætti í Tævan.

Íslenska Free the Nipple-átakið er að sögn Öddu vel þekkt í Tævan.

 

„Maður er bara eins og súperstjarna hérna og það er búið að taka ótrúlega mikið af myndum af mér,“ segir hún hlæjandi og blaðamaður verður að viðurkenna að það kemur honum á óvart en Adda útskýrir málið:

„Ég hitti tvo tævanska stráka á Íslandi í sumar og þeir tóku viðtal við mig um Free the Nipple og svo birtist það í blaði hér úti.“

Hvatning til að halda áfram

Aðspurð hvað verðlaunin þýði fyrir hana segir Adda að þetta sé viðurkenning á því að hún sé að gera eitthvað sem skipti máli.

„Þetta er bara mikil hvatning að halda áfram og fræða fólk um ástandið í heiminum, ekki síst í Afríku þar sem staðan er ekki góð,“ segir Adda en á ungmennaráðstefnunni er meðal annars lögð áhersla á góðgerðarmál og tengist hún samtökunum Heart for Africa sem hjón frá Kanada standa fyrir.

„Þau búa í Svasílandi og reka þar heimili fyrir munaðarlaus börn. Þau eru með 105 börn undir fimm ára á sínu forræði og 280 manns í vinnu. Á hverju ári safna krakkarnir á ráðstefnunni peningum fyrir þessi samtök og í ár erum við að safna fyrir vatnslóni en það er mjög erfitt að nálgast vatn í Svasílandi,“ segir Adda.

Í vetur býr Adda á Spáni þar sem hún er í skiptinámi en hún segist svo gjarnan vilja fara til Svasílands, heimsækja samtökin og taka þátt í sjálfboðaliðastarfi á þeirra vegum.

„Ég bý rétt fyrir utan Madríd og næ vonandi eitthvað að fræða fólkið í skólanum mínum úti um það sem ég hef lært hér á ráðstefnunni. Svo geri ég það sama þegar ég kem heim til Íslands,“ segir Adda.