Bensínhækkanir í vændum: Lítrinn gæti farið í 260 krónur

Þrátt fyrir að mikil óvissa ríki um framtíðarþróun heimsmarkaðsverðs á olíu eru töluverðar líkur á að verð muni hækka umtalsvert á næstu mánuðum. Líkur eru á að bensínlítrinn fari í hátt í 260 krónur í sumar, haldist spár sérfræðinga.

Meðalverð á bensínlítra síðasta sumar voru 250 krónur og er því töluvert í land með að ná samanburðarverðum síðasta árs. Runólfur Ólafsson, framkvæmdastjóri FÍB, segir að þrátt fyrir komandi hækkanir, sé hann bjartsýnn á að verð haldist undir því sem þau voru á síðasta ári.

„Ef ég á að vera alveg hreinskilinn þá hef ég ekki hugmynd um það hversu mikið lítrinn mun hækka, en ég veit að hann mun hækka. Það hefur aðeins dregið úr eftirspurn en framboð hefur aukist. Meðal annars með svokölluðum hliðarborunum og samdrætti í hagvexti sem hefur áhrif, eins og til dæmis í Kína. Ástandið í Sýrlandi, Úkraínu og víðar getur einnig haft áhrif á framleiðslu,“ segir Runólfur.

Sjá einnig: Verð á olíu lækkar ekki í samræmi við heimsmarkað

„Verðið fór mjög ört niður frá miðju síðasta ári, meira en svokallaðir sérfræðingar áttu von á. Í sjálfu sér eru ýmsar kenningar uppi um hver þróunin verði. Menn vilja þó hallast frekar að því að verð muni hækka áfram á næstu mánuðum,“ bætir hann við.

Einstök olíufélög hækkuðu verð á bensínlítranum í dag. Hæst er verðið hjá Skeljungi, en þar er lítrinn á 216,60 krónur. Á N1 er lítrinn kominn í 214,80 krónur en ódýrastur er hann hjá Orkunni á 212,50 krónur.

Sjá einnig: Býst ekki við að önnur félög feti í fótspor Olís

„Að óbreyttu er algengt að eldsneytisverð rísi á vormánuðum og fram á sumar. Það er í takt við eftirspurn eftir því sem sól hækkar á lofti og ferðalög aukast, það er einn þáttur í þessu,“ segir Runólfur að lokum.

Olíuverð hríðféll í lok síðasta árs og byrjun þessa árs en í janúar stóð olíutunnan í 46 dollurum. Hún hafði þá ekki verið lægri í sex ár og lægst fór bensínlítrinn í 197 krónur.