Reyndi að fá Sigmund til að tjá sig með því að þegja

Björn Leví Gunnarsson, þingmaður Pírata, starði á Sigmund Davíð Gunnlaugsson forsætisráðherra í fimmtán sekúndur á Alþingi í dag, í þeirri von að ráðherrann myndi tjá sig um afnám verðtryggingar. Þingmaðurinn hafði þó ekki erindi sem erfiði og uppskar þess í stað hlátur Sigmundar og annarra þingmanna.

Björn fór fram á að Sigmundur útskýrði fyrir þingheimi hvort afnám verðtryggingar ætti heima á hans borði eða hjá fjármálaráðherra. „Þannig að ég get kannski hinkrað hér aðeins þangað til hann biður um orðið,“ sagði Björn og þagði svo næstu sekúndurnar.

Umræðan var rúmlega klukkustundar löng þar sem rædd var dagskrárbreytingartillaga stjórnarandstöðunnar sem vildi fá sérstaka umræðu við Sigmund Davíð um stöðuna á vinnu við afnám verðtryggingar. Stjórnarliðar felldu tillöguna.

Vigdís Hauksdóttir, þingmaður Framsóknarflokksins, sagði með ólíkindum að formenn flokkanna skyldu leggja fram slíka tillögu. Fundað hafi verið um dagskrá þingsins á mánudag og að þá hafi engar athugasemdir borist. . „Hvernig er hægt að eiga samstarf við svona fólk sem gengur sífellt á bak orða sinna?“ sagði Vigdís.

Haldi þinginu gíslingu

Sigmundur sagði það sérkennilega stöðu að stjórnarandstaðan hefði haldið þinginu gíslingu á annan klukkutíma, þar sem hún heimtaði svör við spurningum um verðtrygginguna.

„Og á meðan var ekki hægt að svara spurningum þingmanna. Nú þegar Árni Páll Árnason fær tækifæri til að spyrja spurninga þá hefur hann engan áhuga á að spyrja um verðtryggingu. Hann spyr í staðinn um mál sem hann hefur spurt um áður og hefur fengið svör við áður, mál sem hann hafði misst af þegar svarað var sömu spurningu frá öðrum þingmönnum, meðal annars varaformanni Samfylkingarinnar,“ sagði Sigmundur.

Sigríður Ingibjörg Ingadóttir, þingmaður Samfylkingarinnar, lagði fram beiðni um slíka umræðu í febrúar, aftur í haust og ítrekaði hana í gær. Þá hefur stjórnarandstaðan ítrekað krafist þess að fjallað yrði um þessi mál. Sigmundur svaraði gagnrýni þingmannanna á Facebook á dögunum, og sagði það orðinn fastan lið að „byrja daginn á vænum skammti af bulli“.

Stjórnarandstaðan misnotar nú liðinn fundarstjórn forseta sem aldrei fyrr. Það virðist vera orðinn fastur liður að byrja...

Posted by Sigmundur Davíð Gunnlaugsson on 13. október 2015

Guðlaugur Þór Þórðarson, þingmaður Sjálfstæðisflokksins, sagði það nýja tegund af málþófi að þegja í ræðustól. Nú nýlega þagði Jón Þór Ólafsson, þáverandi þingmaður Pírata, í ræðustól í tæpar tvær mínútur.