Gerir ráð fyrir 250 íbúðum á lóð Ríkisútvarpsins

Tillaga Arkþing um skipulag lóðar RÚV við Efstaleiti bar sigur úr býtum í hugmyndasamkeppni á vegum Reykjavíkurborgar og RÚV. Dagur B. Eggertsson, borgarstjóri og Magnús Geir Þórðarson, útvarpsstjóri, tilkynntu um niðurstöðu samkeppninnar við hátíðlega athöfn í Ráðhúsi Reykjavíkur fyrr í dag.

Í vinningstillögunni er gert ráð fyrir að að byggingarmagn á lóðinni sé samtals um 31.500 m², yfir 250 íbúðum til viðbótar við umtalsvert rými fyrir skrifstofu og þjónustubyggingar.  

Samkeppnin var haldin í samstarfi við Arkitektafélag Íslands og dómnefnd skilaði einróma niðurstöðu. Í áliti dómnefndar segir:

• Höfundar vinna markvisst með stöllun húsa í hæð, formi og mótun lands svo úr verður ásýnd stakstæðra húsa með skemmtilegum þakgörðum og svölum.
• Ný byggð er í góðu jafnvægi við kvarða nærliggjandi byggðar, t.d. húsa við Neðstaleiti og Stóragerði svo dæmi sé tekið. Hlutfall á milli einkarýma og garða og tengsl þeirra við samgönguás gangandi og hjólandi umferðar er sannfærandi.
• Höfundar virðast vinna með grunnform Útvarpshússins og opna á milli húsa fyrir sýn að Útvarpshúsinu sem tryggir því áframhaldandi sess í sínu umhverfi.

• Á suðurhluti lóðarinnar er sýnd atvinnustarfsemi en þó mætti ímynda sér að viss blöndun íbúðar- og atvinnuhúsnæðis væri þar möguleg, t.d. íbúðarhúsnæði á efri hæðum.
• Allt flæði um lóðina er vel leyst og aðgengi í gegnum lóðina fyrir hjólandi, gangandi og akandi umferð er gott.
• Framsetning er mjög góð og kemur hugmyndum höfunda vel til skila.

Ríkisútvarpið og Reykjavíkurborg, í samstarfi við Arkitektafélag Íslands, eftir þátttakendum í forval fyrir lokaða hugmyndasamkeppni um skipulag lóðar Ríkisútvarpsins við Efstaleiti. Alls bárust 16 umsóknir um þáttöku og voru fimm aðilar valdir til að skila inn tillögum.

RÚV hefur auglýst til sölu byggingarrétt á lóðinni við Efstaleiti. Um er að ræða glæsilega útsýnis lóð, sem er vel staðsett miðsvæðis í borginni við skjólgóða útivistarparadís, í rótgróinni byggð með mikla möguleika fyrir aukna þjónustu og atvinnurekstur.

Markmiðið með samstarfi Reykjavíkurborgar og RÚV er að Reykjavíkurborg nái fyrirætlunum sínum um þéttingu byggðar og fleiri leiguíbúðir og RÚV hyggst að nýta ávinningin til að lækka skuldir félagsins sem er yfirskuldsett frá fyrri tíð og hefur stjórn RÚV lagt ríka áherslu á að leysa úr þeim uppsafnaða vanda.