Justin Bieber samþykkir aukatónleika á Íslandi

Poppstjarnan Justin Bieber hefur samþykkt að halda aukatónleika í Kórnum í Kópavogi 8. september næstkomandi, degi fyrir auglýsta tónleika. Miðasala hefst 8. janúar og verður miðaverð það sama og áður. Þetta kemur fram í tilkynningu frá Senu.

Miðar á tónleika Bieber seldust upp á örskotsstundu en fram kemur í tilkynningunni að umfram eftirspurn með miðum hafi verið með „ólíkindum“. Ísleifur Þórhallsson, framkvæmdastjóri Senu, sagði í samtali við fréttastofu á dögunum að í kjölfarið hafi verið ráðist í það að skoða hvort ungstirnið væri tilbúið til að halda hér tvenna tónleika.

„Við erum ekki að ná að mæta eftirspurninni með einum tónleikum og okkur óraði ekki fyrir því að það þyrfti tvenna nítján þúsund manna tónleika í 320 þúsund manna landi, en það er bara staðreynd,“ sagði hann.

Engar íslenskar forsölur verða haldnar að þessu sinni en forsala á vegum aðdáendaklúbbs Justins Bieber fer fram daginn áður.