Nýta þarf Hörpu betur yfir sumartímann

Salir Hörpu voru í notkun tvo þriðju hluta árs í fyrra. Þetta kemur fram í upplýsingum frá tónlistar- og ráðstefnuhúsinu um nýtingu á sölum hússins.

Best nýtti salur hússins, Kaldalón, er jafnframt sá minnsti en hann var í notkun 316 daga úr ári, eða um 87 prósent ársins.

Fæstir viðburðir voru í Silfurbergi, helsta ráðstefnusal hússins, en hann var í notkun 168 daga ársins.

Halldór Guðmundsson, forstjóri Hörpu, segir að mest séu sóknarfærin í ráðstefnuhaldi.

„Við jukum ráðstefnutekjurnar um rúmlega 40 prósent í fyrra og við sjáum mikil sóknarfæri þar.“

Hann segir að glögglega megi sjá árstíðabundinn mun á nýtingu hússins. „Við þurfum mest að bæta okkur að sumri til. Þá er nýtingin minnst þrátt fyrir að mannfjöldinn sem streymir hér í gegn sé sá sami og yfir veturinn.“

Halldór segir að fjöldann yfir sumarið megi rekja til ferðamanna sem koma og skoða Hörpu en þó vanti upp á að í húsinu séu nógu margir viðburðir sem sérstaklega sé beint að ferðamönnum. „Nú þegar húsið hefur ekki verið opið nema í tæp þrjú ár er þetta komið í ótrúlega hátt nýtingarhlutfall. Við höfum verið að reyna að læra af tónlistar- og ráðstefnuhúsum í öðrum löndum en hliðstæðurnar eru frekar vandfundnar. Í alþjóðlegum samanburði er miðað við að raunhæf hámarksnýting sé 80 prósent. Við erum því mjög stolt af því hve nýtingin er góð.“

Að sögn Halldórs kemur ekki til greina að lækka leigugjald fyrir sali Hörpu með það að markmiði að laða fleiri aðila að húsinu.

„Þegar nýtingin er svo mikil sem raun ber vitni og Harpa að berjast í bökkum fjárhagslega, eins og allir vita, þá förum við ekki að lækka leigugjaldið.“ Hann segir að nú þegar megi búast við fleiri ráðstefnum í húsið. „Ráðstefnur eru bókaðar mörg ár fram í tímann, það var því algjörlega óraunsætt á sínum tíma að ætlast til þess að nýopnað hús hýsti margar ráðstefnur fljótlega eftir opnun.“

Guðfinna S. Bjarnadóttir, stjórnarformaður Hörpu, segir að sóknarfæri séu vissulega til staðar.

„Við stjórnin erum í stefnumótunarvinnu og nýting hússins er örugglega eitt af því sem verður til umræðu.“