Opinn fundur um valkosti Skota

Opinn fundur fer fram í dag í Norræna húsinu undir yfirskriftinni „Valkostir Skota: Sjálfstæði eða ríkjasamband?“.

Fundurinn hefst klukkan 12 og stendur yfir í eins klukkustund. Þann 18. september kjósa íbúar Skotlands um það hvort ríkið öðlist sjálfstæði, en atkvæðagreiðslan varð að veruleika eftir baráttu skoska þjóðarflokksins.

Kjósi Skotar sjálfstæði verður til nýtt ríki með um fimm milljónir íbúa. Það verður þá eitt af ríkjum Norður-Evrópu sem kalla má smáríki, ásamt Íslandi og hinum Norðurlöndunum.

Á fundinum verður meðal annars farið yfir hvort sjálfstætt Skotland yrði að leita eftir náinni samvinnu við nágrannaríki og móta sína eigin utanríkisstefnu til þess að geta tekið virkan þátt í alþjóðasamstarfi.

Auk þess yrði Skotland að endurskilgreina tengsl sín við NATO, Evrópusambandið og aðrar stofnanir. Forysta skoska þjóðarflokksins hefur heitið því að vinna náið með Norðurlöndunum og nýta sér þeirra reynslu af virkri þátttöku í alþjóðasamfélaginu.

Skoðanakannanir í Skotlandi sýna að fleiri ætla sér að kjósa nei og vilja halda áfram að vera hluti af Bretlandi.

Á fundinum mun Alyson Bailes, aðjúnkt við Stjórnmálafræðideild Háskóla Íslands, útskýra bakgrunn umræðunnar um sjálfstæði Skotlands og fjalla um helstu málefni kosningarbaráttunnar og möguleg úrslit atkvæðagreiðslunnar.

Baldur Þórhallsson, prófessor við Stjórnmálafræðideild Háskóla Íslands, mun fjalla um Skotland sem mögulegt nýtt smáríki, stöðu þess í Evrópu og ræða um mikilvægar ákvarðanir í utanríkismálum sem sjálfstætt Skotland yrði að taka ef sjálfstæðissinnar bera sigur úr býtum. Fundarstjóri verður Stefán Pálsson, sagnfræðingur.