Kæra samningsgerð 2,7 milljarða stöðvar

Íslenska gámafélagið ehf. og dótturfélag þess, Metanorka ehf., hafa kært Sorpu bs. til kærunefndar útboðsmála vegna samningsgerðar vegna byggingar gas- og jarðgerðarstöðvar fyrir höfuðborgarsvæðið. Samningsgerð Sorpu er kærð þar sem hún er sögð stangast á við lög um opinber innkaup, og bjóða hefði átt verkið út til að gæta að miklum einka- og almannahagsmunum.

Sorpa ákvað strax árið 2007 að kaupa tæknilausn danska fyrirtækisins Aikan Solar fyrir stöðina. Rökin eru að hún sé eina lausnin sem uppfylli markmið byggðasamlagsins um meðhöndlun lífræns heimilissorps, en tæknin gerir sorpflokkun óþarfa. Áætlað er að stöðin muni kosta 2,7 milljarða króna fulluppsett.

Metanorka hafnar því með öllu að tæknilausnin sé einstök og útiloki aðrar. Þvert á móti séu ýmsir aðrir möguleikar í boði þar sem hægt er að ná sömu markmiðum. Þess utan hefur Metanorka, ásamt dönskum samstarfsaðilum, lausn sem kostar helmingi minna en sú sem Sorpa ætlar sér að kaupa. Sú lausn gerir ráð fyrir að heimilissorp sé flokkað, eins og gert er ráð fyrir í stefnu sveitarfélaganna. Þessa lausn hafa forsvarsmenn Metanorku kynnt stjórn Sorpu, án sérstakra undirtekta.

Sorpa telur sig í fullum rétti og leitaði til innkaupadeildar Reykjavíkurborgar um ráðgjöf varðandi útboðsmál stöðvarinnar í maí síðastliðnum. Þar segir að ljóst sé að verkefni af þeirri stærðargráðu sem um ræðir falli undir gildissvið laga um opinber innkaup, og undir valdsvið kærunefndar útboðsmála.

Þar er sagt að samningsgerð við Aikan hafi verið í samræmi við lög um opinber innkaup, og vísað til lagagreinar um samningskaup án undangenginnar útboðsauglýsingar. Þar segir að kaup séu heimil „þegar aðeins eitt fyrirtæki kemur til greina af tæknilegum eða listrænum ástæðum eða sökum þess að um lögverndaðan einkarétt er að ræða“.

Á þessu atriði grundvallast kæran. Kærendur segja að það liggi fyrir að margir geti boðið þessa tæknilausn. Því standist ekki rökstuðningur Sorpu með vísan til lagagreinar um að aðeins eitt fyrirtæki hafi komið til greina af tæknilegum ástæðum eða um einkarétt sé að ræða.