300 þúsund þegar komin

Nærri 300 þúsund manns hafa sótt Ísland heim það sem af er ári. Fjölgunin nemur nær 70 þúsund ferðamönnum, samkvæmt nýjum tölum Ferðamálastofu.

Fjöldi ferðamanna sem fóru frá landinu í maí hefur aldrei verið meiri, en héðan fóru 66.700 í mánuðinum miðað við 55.600 í maí í fyrra. Fjöldi ferðamanna hefur nærri tvöfaldast frá árinu 2011. Fjölgun hefur einnig verið í hinum mánuðum ársins miðað við sömu mánuði í fyrra.

Ferðamönnum fjölgar frá velflestum löndum, þó mælist ekki fjölgun á meðal Þjóðverja og Norðmanna. Bandaríkjamenn og Bretar eru stærsti ferðamannahópurinn í maí líkt og í fyrra. Þeir ásamt Kanadabúum standa undir nærri helmingi allrar fjölgunar ferðamanna í maí.