Hiti á Alþingi vegna umhverfismála

Sigurður Ingi Jóhannsson umhverfisráðherra fékk á sig harða gagnrýni á þingi á fimmtudag þegar hann vísaði breytingartillögu við rammaáætlun til atvinnuveganefndar Alþingis.

Tillagan sem vísað var til atvinnuveganefndar snýr að tilfærslu Hvammsvirkjunar í Þjórsá úr biðflokki rammaáætlunar í orkunýtingarflokk. Tillagan er breyting á rammaáætlun sem samþykkt var í janúar í fyrra. Það var verkefnisstjórn rammaáætlunar sem lagði breytinguna til en við samþykkt rammaáætlunar á síðasta ári hafði tillögu verkefnisstjórnar um nýtingu Hvammsvirkjunar verið snúið við af þáverandi umhverfisráðherra. 

Segja má að botninn hafi dottið úr umræðunni vegna vísunar Sigurðar Inga og var henni því frestað þar til eftir páska. Tillagan fór því ekki inn í nefnd eins og áætlað var. 

Þingmenn Vinstri grænna fullyrða að tillagan eigi heima í umhverfis- og samgöngunefnd.

Svandís Svavarsdóttir, þingkona VG, segir að umhverfisráðherra hafi með þessu slitið rammaáætlun í sundur.

„Stóra tillagan var afgreidd og unnin í umhverfisnefnd enda er rammaáætlun á forræði umhverfisráðherra samkvæmt forsetaúrskurði. Umhverfisnefnd er búin að vera að vinna með rammaáætlun þannig að þetta er ekki bara vitlaust heldur líka óskynsamlegt. Með þessu erum við búin að rjúfa í sundur rammaáætlun og farið er út fyrir hugmyndina um vernd og nýtingu.“ 

Hún segir að umhverfisráðherra sé að reyna að draga úr vægi umhverfisverndar. „Þetta eru ekki mistök heldur pólitísk afstaða.“ 

Jón Gunnarsson, formaður atvinnuveganefndar, segir að færslan sé í takt við stefnu ríkisstjórnarinnar,

„Þetta er í samræmi við málflutning okkar í þessu máli. Við gagnrýndum mjög að þetta væri sett til umhverfisverndar en ekki atvinnuveganefndar á síðasta kjörtímabili.“ 

Rammaáætlun hafði áður verið á forræði iðnaðarnefndar þegar áætlunin heyrði undir iðnaðarráðuneytið. Það breyttist þegar umhverfis- og auðlindaráðuneyti var stofnað árið 2012.

Einar K. Guðfinnsson, forseti Alþingis, sagði við umræðu málsins á þingi að það samrýmdist þingsköpum. 

„Annars vegar er talað um að mál sem lúta að rannsóknum auðlinda eigi að fara í umhverfisnefnd en nýting þeirra í atvinnuveganefnd. Túlkun á þessu hefur hins vegar verið umdeild í þinginu.“ Einari finnst líklegt að til atkvæðagreiðslu komi um meðferð tillögunnar eftir páska. 

Katrín Jakobsdóttir, formaður Vinstri grænna, segir þingsköp skýr. „Ég tel að þeir séu að mistúlka þingsköpin og hef enga trú á öðru en að það verði leiðrétt.“

Ekki náðist í Sigurð Inga Jóhannsson við vinnslu fréttarinnar.