Tugmilljóna smásjá til frumurannsókna

Ný hágæðasmásjá, sem kemur til með að valda straumhvörfum í rannsóknum í frumulíffræði, verður vígð í Háskóla Íslands á næstu dögum.

Smásjáin, sem er hýst í Læknagarðinum, kostaði tugi milljóna króna. Hún kemur til með að nýtast í mikilvægum rannsóknum sem skipta sköpum fyrir læknisfræðilegar rannsóknir á Íslandi.

Eiríkur Steingrímsson, prófessor í læknadeild HÍ, segir tilkomu smásjárinnar gífurlega þýðingarmikla fyrir samfélagið. „Smásjáin gerir okkur vísindamönnum kleift að skoða staðsetningu próteina innan í frumum, jafnvel þegar fruman er lifandi. Hún verður nýtt í lífvísindarannsóknir, til að auka skilning á og auðvelda rannsóknir á alvarlegum sjúkdómum á borð við brjóstakrabbamein, sortuæxli, arfgenga heilablæðingu og í stofnfrumurannsóknir.“

Kaupin á tækinu eru afrakstur samvinnu margra vísindahópa, sem stóðu í sameiningu að styrktarumsókninni. „Um er að ræða mörg rannsóknarteymi, og þau munu öll koma til með að nýta smásjána í sínum rannsóknum,“ segir Eiríkur. „Við erum að leita eftir því að efla samstarf dreifðra stofnana sem allar sinna rannsóknum af þessu tagi, bæði utan og innan háskólans í þeirri viðleitni að efla samstarfið.Lífvísindasamfélagið á Íslandi er lítið, en það er stöðugt að eflast. Tilkoma smásjárinnar er liður í því.“

Smásjáin er af gerðinni Olympus FV1200, sem er fluorescent conofal-smásjá af bestu gerð. Sú smásjá sem áður var nýtt í rannsóknir af þessu tagi var ekki nándar nærri eins öflug og þessi, og umskiptin því gríðarleg.

„Þetta er allt annað, þetta er í raun eins og að skipta út Trabant fyrir Benz,“ segir Eiríkur stoltur.

Vígslan fer fram í Læknagarði 23. apríl og mun menntamálaráðherra annast hana.