Líkamsárás fangavarða á Litla Hrauni rannsökuð

Lögreglan á Selfossi rannsakar nú meinta stórfellda líkamsárás fjögurra starfsmanna Litla-Hrauns á fanga sem situr þar inni. Árásin mun hafa átt sér stað síðastliðinn miðvikudag.

Fanginn, sem vill ekki láta nafns síns getið, segir í samtali við Fréttablaðið að einn starfsmaður fangelsisins hafi komið upp að sér ásamt þremur fangavörðum. Þeir hafi beðið hann að fylgja sér í klefa hans til að gera þar leit.

Ekki munu þeir þó hafa farið í klefann heldur segir hann að þeir hafi gengið í skrokk á honum og meðal annars kýlt hann svo tvær tennur brotnuðu. Eftir árásina er hann mjög aumur í kjálkanum og finnur fyrir miklum bakverkjum.

„Þá taka þeir mig, rífa mig úr fötunum og setja mig í einangrunarklefa í eina nótt. Þar má ég hringja eitt símtal sem ég notaði til að hringja í lögmanninn minn,“ segir maðurinn.

Tveir lögreglumenn fóru þá á Litla-Hraun ásamt lögmanni til þess að taka myndir af fanganum og áverkum hans og var hann aftur færður úr einangrun í klefa sinn. Morguninn eftir segist hann hafa séð forsprakka þeirra, sem hann sakar um að hafa ráðist á sig, glotta til sín.

„Hann glottir bara, spyrjandi hvort ég sé eitthvað hnjaskaður. Ég segi auðvitað er ég hnjaskaður eftir að þú varst að lemja mig. Hann spyr hvort ég sé ekki bara hnjaskaður út af dópinu.“ Fanginn hefur setið inni á Litla-Hrauni í um hálft ár. „Honum er búið að vera meinilla við mig frá því að ég kom.“

Maðurinn kveðst ekki hafa gert neitt til að verðskulda þessa meðferð og ekki sé í lagi að forsprakki umræddra fangavarða fái að starfa áfram í fangelsinu. „Það er ekki í lagi að þessi maður fái að stjórna líðan manna. Það er búið að svipta okkur frelsinu og þarf ekki að lemja okkur líka. Hann hefur ekkert sér til málsbóta.“

Lögreglan á Selfossi staðfesti að málið sé til rannsóknar en vildi ekki gefa neinar frekari upplýsingar. Forsprakki fangavarðanna sem um ræðir neitaði að tjá sig um málið í samtali við Fréttablaðið.

Þá náðist hvorki í Margréti Frímannsdóttur, forstöðukonu Litla-Hrauns, né Pál Egil Winkel, forstjóra Fangelsismálastofnunar, þrátt fyrir ítrekaðar tilraunir. Ekki fengust upplýsingar um það hvort fangaverðirnir hafi verið leystir frá störfum meðan á rannsókninni stendur.