Ný íþróttamiðstöð hjá GKG

Formaður Golfklúbbs Kópavogs og Garðabæjar, Guðmundur Oddsson, skrifaði í gær undir viljayfirlýsingu um byggingu nýrrar íþróttamiðstöðvar GKG ásamt bæjarstjórunum Ármanni Kr. Ólafssyni og Gunnari Einarssyni.

GKG er 20 ára á þessu ári. Í klúbbnum eru nú tvö þúsund félagar, 338 af þeim eru börn og unglingar undir 15 ára aldri. Að auki eru 67 einstaklingar 16 til 18 ára og um 470 krakkar fara í gegnum golfleikjanámskeið GKG. Það eru því tæplega 900 börn og unglingar sem nýta sér þjónustu GKG á hverju ári. Þess má geta í því samhengi, að stærsti klúbbur Danmerkur er með 180 börn og unglinga skráða sem meðlimi.

Klúbburinn segir aðstöðuna ekki hafa fylgt auknum fjölda iðkenda en núverandi golskáli var söluskáli á Selfossi og keyptur af GKG vorið 1990. Undanfarin ár hefur því verið unnið að þarfagreiningu á klúbbhúsi fyrir GKG. Í ljósi þess að barna- unglinga og afreksstarf félagsins er með þeim hætti sem er, þarf að taka mið af því við byggingu nýs klúbbhúss. Það var því niðurstaðan að sameina innanhússæfingastöðu við félagsaðstöðuna og byggja Íþróttamiðstöð í stað hefðbundins klúbbhúss. Búið er að teikna drög að Íþróttamiðstöðinni og er það Helgi Már Halldórsson sem unnið hefur þá vinnu.

Gunnar Einarsson bæjarstjóri Garðabæjar fór yfir hve mikilvæg starfsemi GKG væri fyrir samfélagið. Fyrir utan það forvarnagildi sem barna- og unglingastarfið væri, þá væri það líka mikilvægt að búa sem mestan fjölbareytilieika.

Ármann Kr. Ólafsson bæjarstjóri Kópavogs bætti því við að golfið væri íþrótt sem hægt væri að stunda fram eftir aldri og um 200 eldri borgarar eru skráðir í GKG. Margir þeirra spila golf allan ársins hring og veitir golfið með þeim hætti þessum bæjarbúum glæsilega hreyfingu sem og félagslíf.