Vill einfalda fiskeldisreglur

Sigurður Ingi Jóhannsson sjávarútvegsráðherra hefur mælt fyrir frumvarpi um breytingu á lögum um fiskeldi sem miðar að því að einfalda stjórnsýslu, eftirlit og leyfisveitingarferli.

Í frumvarpinu er einnig að finna nýmæli um auknar kröfur til búnaðar í sjókvíaeldi með það að markmiði að verja hagsmuni villtra laxastofna.

Lagt er til að leyfisveitingarferli í fiskeldi verði þjónustað og stýrt frá Matvælastofnun í stað þriggja aðila áður og að leyfi verði afgreidd innan sex mánaða frá umsókn. Verði frumvarpið að lögum mun stofnunin einnig sjá um eftirlit með leyfisskyldri starfsemi og gera þjónustusamninga við aðrar stofnanir.

Í frumvarpinu er einnig að finna ákvæði um Umhverfissjóð sjókvíaeldis sem verður meðal annars nýttur til að gera burðarþolsmat fyrir sjókvíaeldissvæði til að tryggja sem besta nýtingu þeirra en skort hefur á grunnrannsóknir því tengdu. Fjölmörg önnur atriði er að finna í frumvarpinu sem ætlað er að tryggja sem best samspil greinarinnar og umhverfis og byggja undir fiskeldi sem atvinnugrein til framtíðar.