UNICEF og Kiwanis gegn stífkrampa

UNICEF á Íslandi og Kiwanisumdæmið Ísland og Færeyjar hafa tekið höndum saman og hvetja landsmenn til að leggja baráttunni gegn stífkrampa lið.

Í tilkynningu frá UNICEF segir að á níundu hverri mínútu deyi nýbökuð móðir eða nýburi úr þessum kvalafulla sjúkdómi en með bólusetningu megi koma í veg fyrir hvert einasta dauðsfall af hans völdum.

Af þessu tilefni var opnuð sögusýning í Kringlunni í gær þar sem gestir og gangandi geta fræðst um sögu Kiwanis sem fagnar 50 ára afmæli hérlendis samhliða átakinu gegn stífkrampa. Félagar í Kiwanis munu auk þess dreifa upplýsingum um samstarfið við UNICEF og mikilvægi þess að stöðva stífkrampa fyrir fullt og allt.

Meðal þess sem samtökin vilja vekja athygli á er að það kostar aðeins 210 krónur að bólusetja barnshafandi konu og ófætt barn hennar gegn þessari veiki.

„Það er furðuleg tilhugsun að svo lág upphæð geti skilið á milli lífs og dauða,“ segir Stefán Ingi Stefánsson, framkvæmdastjóri UNICEF á Íslandi.

Í tilkynningunni segir að þótt bakterían sem veldur stífkrampa fyrirfinnist í öllum löndum jarðar hefur sjúkdómnum víðast hvar verið útrýmt með bólusetningu. Á árum áður var stífkrampi til að mynda landlægur meðal ungbarna á Íslandi og dánartíðni geysilega há. Í dag er hann er hins vegar nánast óþekktur á Vesturlöndum.

Tekist hefur að útrýma stífkrampa í 34 löndum frá síðustu aldamótum og lækka dánartíðni nýbura af völdum sjúkdómsins um hvorki meira né minna en 90 prósent á tuttugu árum. Hann er þó enn að finna í 25 ríkjum.

„Alþjóðlega Kiwanishreyfingin og UNICEF eiga að baki árangursríkt samstarf í baráttunni fyrir bættum lífsskilyrðum barna á heimsvísu. Nú leggjum við hér á Íslandi og í Færeyjum okkar lóð á vogaskálarnar í baráttu beggja samtaka gegn stífkrampa,“ segir Dröfn Sveinsdóttir, umdæmisstjóri Kiwanis á Íslandi og í Færeyjum.

„Meirihluti mæðra og nýbura sem látast úr stífkrampa búa á svæðum þar sem konur eru fátækar og hafa takmarkaðan aðgang að heilsugæslu og upplýsingum um öruggar barnsfæðingar. Þetta eru mæður og börn sem við megum ekki bregðast.“