Váleg tíðindi

Váleg tíðindi bárust með vindinum um daginn. Nefnilega þau, að stórauka ætti, nú þegar of mikinn, útflutning til Rússlands, á niðurgreiddu rolluketi sem framleitt er á mjög illa förnu eða örfoka landi.

Og hvað er það sem fer svona fyrir brjóstið á mér? Jú, nefnilega það að það eru ekki skilyrði í landinu til að gera þetta framkvæmanlegt, þar sem gróðurhulan á landinu hefur minnkað úr 75% í 25% frá landnámi fram á þennan dag. Hún þekur sem sagt nú um 25% landsins og þar af eru aðeins um 4-5% heil gróðurþekja, allt hitt mismunandi mikið götótt.

Þessar upplýsingar ætla seint að komast inn í hausinn á löndum mínum því heilaþvotturinn frá bændasamtökunum og stjórnmálaflokkunum er svo yfirgnæfandi, að ein lítil rödd úr eyðimörkinni má sín lítils. Það eru nefnilega of fáar raddir í mínu liði sem heyrast og er það miður, þar sem margir miklir og mikið menntaðir menn á þessu sviði eru mér sammála. Ég skora hér með á þá að láta í sér heyra, því meiri líkur eru á að landsmenn trúi þessum ömurlega sannleika ef þeir taka til máls.

En það eru að vísu gleðileg teikn á lofti um þessar mundir, nefnilega þau, að þetta gæti dregist með útflutninginn til Rússanna, því nú þarf að snara sér yfir í það að refsa þeim fyrir framferði sitt í Úkraínu og loka á öll viðskipti við þá, eða er nokkuð annað í stöðunni? Ég ætla a.m.k. að halda í þetta litla vonarhálmstrá um sinn.

Þangað til bið ég til Guðs að skynsamir menn taki völdin í landbúnaðarráðuneytinu og hætti að niðurgreiða framleiðslu á kjöti sem framleitt er á illa förnu landi, og banni auk þess allan útflutning á því. Nóg er að framleiða fyrir innanlandsmarkað sem minnkar ört með árunum, þar sem kjötdýrkun fer þverrandi, a.m.k. hjá þeim sem eru upplýstir um skaðsemi of mikils kjötáts.

Næsta grein mín mun fjalla um árlegar, alveg ótrúlega svívirðilegar auglýsingar MS, þar sem börn landsins eru misnotuð í auglýsingaherferðinni og sjónvarp allra landsmanna tekur þátt í.