Verulegar fjárhæðir lenda á heimilum vegna vatnstjóns

Forvarnir Samstarfshópur um varnir gegn vatnstjóni hefur verið stofnaður en gríðarlegt eignatjón, mikil óþægindi og jafnvel heilsutjón verður vegna vatnsleka, raka og myglu á íslenskum heimilum ár hvert.

Tryggingafélögin bæta hluta tjónsins en verulegar fjárhæðir lenda á heimilunum, bæði vegna sjálfsábyrgðar en einnig vegna þess að tjónin eru ekki alltaf bótaskyld. Til að mynda voru 134 mál vegna vatnstjóns ekki bótaskyld að nokkru leyti hjá tryggingafélaginu Verði í fyrra.

„Ástæður þess að ekki er um bótaskyldu að ræða geta verið margvíslegar en þumalputtareglan er að þau tjón sem eru bótaskyld, eru tjón vegna vatns sem óvænt og skyndilega streymir fram og á upptök sín innan útveggja og botnplötu vegna bilunar eða mistaka. En tjón sem myndast á löngum tíma er almennt ekki bætt,“ segir Kristmann Larsson, deildarstjóri vátryggingasviðs Varðar.

Hann segir tjón vegna utanaðkomandi vatns almennt ekki vera bætt, og eitt algengasta tjónið sem ekki er bætt er þegar hús leka vegna þess að þau eru óþétt af einhverjum ástæðum, og er töluvert um slík tjón á hverju ári.

Samstarfshópurinn telur að mjög megi draga úr þessu tjóni með fræðslu til almennings og aukinni þekkingu og fagmennsku iðnaðarmann. Hópurinn bendir á ýmsar leiðir til að draga úr vatnstjóni. Til að mynda er mælt með að láta löggilta fagmenn ávallt annast pípulagnir og frágang í votrýmum, að fólk sinni umhirðu og eftirliti með lögnum og tækjum og að fólk kunni að bregðast rétt við þegar vatnsleki verður.

Að hópnum standa ellefu fyrirtæki, stofnanir og samtök, svo sem tryggingafélög og félög iðnaðarmanna.