Tilkynnti Pharrell Williams að hún væri stór dós

Nafn? Kamilla Ingibergsdóttir

Aldur? 34 ára

Starf? Kynningarstjóri Iceland Airwaves

Hvern faðmaðir þú síðast?

Hana Evu Einarsdóttur, vinkonu mína og borgarfulltrúa, en ég var ekki búin að hitta hana allt of lengi.



En kysstir? Eva fékk líka koss.



Hver kom þér síðast á óvart og hvernig?

Agus Makkie, indónesískur blaðamaður, sem hefur komið á Iceland Airwaves síðustu árin og færir mér alltaf gjöf. Á síðustu hátíð gaf hann mér kaffi frá Jövu og hálsklút. Hann er topp næs gaur.



Hvaða galla í eigin fari ertu búin að umbera allt of lengi?



Ég held að partur af því að eldast og þroskast sé að taka sjálfan sig í sátt og allt sem manni fylgir, bæði galla og kosti.



Ertu hörundsár? Já, pínu.



Dansarðu þegar enginn sér til?



Já, ég hugsa að ég dansi meira þegar enginn sér til en þegar einhver sér til.



Hvenær gerðirðu þig síðast að fífli og hvernig?

Það sem stendur upp úr er þegar ég hitti Pharrell Williams á SXSW í Texas í fyrra og varð svo „starstruck“ að ég sagði „I'm a huge can“ þegar ég ætlaði að segjast vera „huge fan“. Ég fer ennþá að hlæja við tilhugsunina um að hafa sagst vera risastór dós við Pharrell Williams.



Hringirðu stundum í vælubílinn?

Ég tárast yfir óþarfa mörgu en ég held að það sé algjör óþarfi að hringja á vælubílinn yfir því.



Tekurðu strætó?

Ég tók mikið strætó áður fyrr en á í dag bíl og er líka heppin að búa nálægt vinnu og miðbænum.



Hvað eyðirðu miklum tíma á Facebook á dag?

Ég nota samfélagsmiðla mikið í mínu starfi og fel þess vegna óhóflega Facebook-notkun á bak við það.



Ferðu hjá þér þegar þú hittir fræga eða heilsarðu þeim? Bara þegar ég hitti Pharrell Williams.



Lumarðu á einhverju sem fáir vinir þínir vita um þig?

Ég elska ís og hef alltaf pláss fyrir hann. En ég held reyndar að allir vinir mínir viti það.



Hvað ætlarðu alls ekki að gera um helgina?

Ég ætla alla vega ekki að ákveða að gera ekki eitthvað og fara síðan á bömmer ef ég geri það.