Lengingu varnargarðs við Markarfljót mótmælt

„Með því að veita Markarfljóti með þessum hætti til austurs teljum við að verið sé að setja lönd og byggð í mikla hættu,“ segir í bréfi íbúa austan Markarfljóts sem mótmæla fyrirhugaðri lengingu varnargarðs vestan megin árinnar.

Sveitarstjórn Rangárþings eystra hefur með fyrirvara samþykkt ósk Vegagerðarinnar um að leiðigarðurinn verði lengdur um 250 metra. Tilgangurinn er að beina sandburði úr Markarfljóti frá Landeyjahöfn.

Sjá ekki rök fyrir gagnsemi

Íbúarnir segjast ekki hafa séð afgerandi rök fyrir því að leiðigarðurinn geri nokkurt gagn varðandi Landeyjahöfn. „Síðustu mánuði hefur aðalfarvegur Markarfljóts sótt austur neðan brúar og lagst að Seljalandsgarðinum sem hefur látið á sjá,“ segja íbúarnir og útskýra að sandur sé farinn að fylla farveginn þannig að hluti fljótsins renni austur. Þekkt sé að klakastíflur myndist í Markarfljóti og það skapi hættu á að vatn leiti til austurs.

„Teljum við nauðsyn að fá varnargarð austan megin við Markarfljót til varnar byggðinni,“ segja íbúarnir sem gagnrýna jafnframt að ekkert samráð hafi verið haft við landeigendur og íbúa á svæðinu um það að lenging varnargarðsins skuli ekki háð mati á umhverfisáhrifum.

Mótmælunum fylgja 52 undirskriftir sem Ísólfur Gylfi Pálmason sveitarstjóri segir ekki aðeins vera frá þeim bæjum sem eigi land að Markarfljóti.

Fyrirvari um samþykki landeigenda

„Að okkar mati er um ákveðinn misskilning að ræða sem ber að leiðrétta,“ segir í bréfi sem Ísólfur Gylfi sendir mótmælendunum fyrir sína hönd og skipulags- og byggingarfulltrúa sveitarfélagsins. Þar er undirstrikað að skipulagsnefnd og síðar sveitarstjórn setji þau skilyrði fyrir lengingu garðsins að framkvæmdin sé samþykkt af landeigendum og Fiskistofu. Þess utan sé ítrekuð sú skoðun að Markarfljót verði stokkað af með varnargörðum allt niður að ósi austan megin fljótsins.

Þá er í bréfinu til íbúanna bent á umsögn Skipulagsstofnunar um málið.

„Niðurstaða stofnunarinnar er sú að megináhrif af fyrirhuguðum framkvæmdum vegna færslu óss Markarfljóts til austurs, að hvorki sé líklegt að um verði að ræða neikvæð áhrif vegna landbrots upp með farvegi fljótsins eða að ósinn muni færast lengra í austur en ætlað er með tilkomu garðsins,“ segja sveitarstjórinn og byggingarfulltrúinn.