Aníta keppir í New York í dag

ÍR-ingurinn Aníta Hinriksdóttir keppir í kvöld á Millrose Games í New York sem er eitt þekktasta innanhússmót heims og fer fram í glæsilegri höll á Manhattan.

Lengst af var mótið haldið í Madison Square Garden en árið 2012 var það flutt í Washington Heigts hverfið í Manhattan sem skartar glæsilegustu frjálsíþróttahöllinni vestan Atlantshafsins.

Aníta fær verðuga keppni í 800 metra hlaupinu en sterkasti keppi-nauturinn er Ajee Wilson, sem var áttunda á heimslista ársins 2013 og er heimsmeistari unglinga árið 2012.

Annar keppandi, Natoy Goule frá Jamaica, á einnig betri tíma en Aníta, eða 1:59,33 mínútur og var hún í 31. sæti á heimslistanum árið 2013. 

Sama ár varð Aníta í 44. sæti á heimslistanum með sinn besta tíma 2:00.49 mínútur sem hún hljóp á 30. júní 2013 í Mannheim í Þýskalandi. Innanhúss á Aníta best hlaup upp á 2:01.81 mínútur síðan 19. janúar á þessu ári.

Hlaupið fer fram í kvöld klukkan 16:38 á NY tíma eða klukkan 21:38 að íslenskum tíma.