"Forkastanleg framkoma vinaþjóða"

„Nú gerast þeir atburðir síðustu sólarhringa að þeir sem við höfum átt í viðræðum við ákveða að funda sameiginlega án aðkomu Íslands. Sú ákvörðun þessara aðila að útiloka menn frá samningaborðinu er forkastanleg. Það er forkastanlegt að hálfu vinaþjóða okkar, og nágrannaríkja, að koma saman, vitandi vits, án aðkomu Íslendinga, og gera með sér samkomulag án þess að okkur sé einu sinni hleypt að samningaborðinu. Við eigum að senda ákveðin skilaboð til Norðmanna, til Færeyinga, til ESB, og til annarra sem hafa þóst vera í eiginlegum samningaviðræðum við okkur skýr skilaboð um það að við kunnum ekki að meta þetta. Og að Alþingi Íslendinga fordæmi þessi vinnubrögð og áskilur sér allan rétt í framhaldinu til eðlilegrar hlutdeildar í makrílstofninum,“ sagði Bjarni Benediktsson, fjármálaráðherra, á Alþingi við upphaf þingfundar nú rétt í þessu.

Þar var hann að bregðast við fyrirspurn Árna Páls Árnasonar, formanns Samfylkingarinnar, sem sagði þingheim hafa orðið vitni að kostulegum atburði í gærkvöldi þegar fréttir bárust af samning viðsemjenda Íslands í makríldeilunni. Ráðherra málaflokksins hafi komið „gjörsamlega af fjöllum“ og væri til marks um það að ríkisstjórnin kæmist ekki einu sinni að samningaborði, en þeim væri þó falin sú ábyrgð að gæta hagsmuna þjóðarinnar, og það ekki síst í jafn stóri máli og makríldeilunni.

Tilefni umræðunnar er að í gær sömdu Evrópusambandið, Noregur og Færeyjar um skiptingu veiðiheimilda á makríl. Ísland stendur utan þess samkomulags. Samkvæmt samningnum sem undirritaður var fá Færeyingar 156 þúsund tonn, Norðmenn 279 þúsund tonn og Evrópusambandið fær 611 þúsund tonn í sinn hlut. Þá standa enn útaf tæp 190 þúsund tonn, og hluti þess afla stendur Íslendingum til boða hafi þeir vilja til þess að ganga inn í samninginn.

Bjarni vildi hins vegar meina það að málið ætti ekki að vera notað til að fella pólitískar keilur, sem Árni svaraði á þann hátt hvort engar bjöllur hafi hringt þegar Færeyingar ákváðu að sitja eftir í Edinborg í Skotlandi þar sem síðasta hrina samningalotunnar fór fram. „Það voru ákvarðanir teknar sem ríkisstjórn Íslands ber ábyrgð á og þau kunna að hafa kallað fram þessa stöðu,“ sagði Árni og vísaði til þess að samninganefnd Íslands fór heim og gaf út að samningar væru útilokaðir vegna afstöðu Noregs.