Þú manst að við fórum í sleik árið 2010?

Spurningaálfurinn Nilli heldur ferð sinni um framhaldsskóla landsins áfram. Í þessarri viku etur hann saman Verkmenntaskólanum á Akureyri og Menntaskólanum við Hamrahlíð.

Nilli gleymdi reyndar að semja spurningar fyrir þáttinn þannig að hann sankaði að sér alfræðibókum og spurningaspilum á bókasöfnum skólanna til að redda málunum.

Hann virðist hafa verið uppteknari af því að daðra við forseta nemendafélaganna í báðum skólum, þær Stefaníu Töru í VMA og Vigdísi Hafliðadóttur í MH.

Hlutirnir verða vægast sagt vandræðalegir þegar hann rifjar upp kossaflens sitt og Vigdísar en svo virðist sem henni þyki sá atburður ekki jafn eftirminnilegur og Nilla.

Í Menntaskólanum í Hamrahlíð mæta miklar kanónur til leiks, sigurlið Gettu betur frá því í fyrra, þau Kristinn Már, Guðrún og Þórgnýr.

Nilli var einnig hæstánægður með ferð sína til Akureyrar og segir nemendur VMA mjög gefandi en Sindri Snær, Stefanía Tara og Guðmundur Orri keppa fyrir hönd VMA.