19 milljónir í bætur frá tryggingafélagi

Vátryggingafélag Íslands var dæmt í Héraðsdómi Reykjavíkur til þess að greiða bílstjóra flutningabifreiðar tæpar 19 milljónir króna með vöxtum vegna slyss sem hann varð fyrir haustið 2008.

Bílstjórinn stefndi tryggingafélaginu til viðurkenningar á greiðsluskyldu úr slysa­tryggingu ökumanns.

Í málinu var tekist á um það meðal annars hvort bílstjórinn hefði verið við stjórn bifreiðarinnar þegar hún valt á leið hans frá Patreksfirði til Suðureyrar. Af hálfu tryggingafélagsins var því haldið fram að svo hefði ekki verið. Ekki sé um stjórn bifreiðar að ræða þegar bílstjóri situr í kyrrstæðri bifreið, jafnvel þó setið sé undir stýri.

Í skýrslu bílstjórans fyrir dómi sagðist hann hafa verið að aka í versta veðri sem hann hafi lent í. Bifreiðin hafi fest þegar eitthvað gaf sig undan hægra hjólinu og bíllinn seig niður. Hann hafi ekki náð að bakka út úr þessu. Bifreiðin hafi skollið á hliðina á 15 til 20 sekúndum.  Aðstæðurnar hafi verið skelfilegar í stjórnhúsinu. Hann hafi fyrst ætlað að fara út, en hafi hætt við það. Það hafi flætt mikið inn í bifreiðina.

Hann hafi hafst við í bílnum í um átta klukkustundir en þá komu vegfarendur honum til aðstoðar. Við þetta hefði hann fengið áverka á mjóbak og mjaðmir vegnar þeirrar erfiðu stöðu sem hann var í þegar hann beið í bifreiðinni.