"Óþægilegt, kalt og erfitt", segja íslensk systkini um reynslu sína af flóttamannabúðum

"Þetta var óþægilegt, kalt og erfitt", segja íslensk systkini um reynslu sína af flóttamannabúðum hér á landi. Þau léku í auglýsingu sem UNICEF á Íslandi frumsýnir í kvöld og er ætlað að vekja athygli á ömurlegu hlutskipti flóttabarna í heiminum.

Auglýsingin markar upphafið að söfnunarátaki og voru flóttamannabúðir settar upp við Sólbrekku við Grindavík.

„Allt of mörg börn í heiminum búa við þær aðstæður að vera á flótta eða á neyðarsvæðum vegna átaka eða náttúruhamfara og þess vegna datt okkur í hug að setja þetta í íslenskt samhengi,“ segir Stefán Ingi Stefánsson, framkvæmdastjóri UNICEF á Íslandi.

Íslenska auglýsingastofan og True North gáfu auglýsinguna og um 80 manns voru á tökustaðnum í nístingskulda, meðal annars 30 börn. Myndað var fram á kvöld og svo voru búðirnar teknar saman.

„Þá fór ég einmitt að hugsa um hvernig það væri ef allir krakkarnir sem fóru heim í heitum strætóum og voru með kakó og mat og dúnúlpur, hefðu þurft að vera þarna yfir nóttina. Hvernig væri það ef þau hefðu þurft að vera hérna í viku eða mánuð?“ spyr Stefán.

Systkinin Einar Freyr, Arna Ýr og Þórður Andri Bergsbörn léku í auglýsingunni og þeim fannst það skemmtilegt en krefjandi. Krakkarnir gáfu sína vinnu eins og aðrir sem að verkefninu komu. Í meðfylgjandi myndskeiði er rætt við krakkana og sýnd brot úr auglýsingunni og frá vinnunni á tökustað.

Hægt er að styrkja átakið um 1900 krónur með því að senda sms-ið "BARN" á númerið 1900.